Elordada jas aqyndar músháırasynyń jeńimpazdary belgili boldy
ASTANA. QazAqparat - Astanada QR memlekettik rámizderiniń 25 jyldyǵyna oraı qalalyq jas aqyndar músháırasy ótti, dep habarlaıdy elorda ákimdiginiń medıa ortalyǵy.
Medıa ortalyqtyń habarlaýynsha, elordada qalalyq Jastar saıasaty máseleleri basqarmasynyń uıymdastyrýymen 16-29 jas aralyǵyndaǵy aqyndar arasynda músháıra jeńimpazdaryn marapttaý rásimi ótti. Jas aqyndar «Memlekettik rámizder - maqtanashym» jáne «Máńgilik el - muratym» taqyrybynda jyr jazǵan.
Osylaısha qazylar alqasynyń sheshimimen, júldeli ІІІ oryndy Ábil Mıras (Astana qalasy), Dıdar Uzaǵalıev (Atyraý oblysy), Sherhan Talap (Batys Qazaqstan oblysy) ózara bólisip, 100 myń teńgelik syıaqyǵa ıe boldy. 200 myń teńgelik ІІ júldeni qaraǵandylyq Aqjigit Amankeldi qanjyǵysyna baılasa, І orynǵa ıe bolǵan Raýan Qabıdoldın (Shyǵys Qazaqstan) 300 myń teńgeni enshiledi.
Al «Úzdik aqyn» atalymyna Álibek Amandyqov (Atyraý oblysy), Jámılıa Bahtııarqyzy (Almaty oblysy), Aınur Polatova (Aqtóbe oblysy), Uljalǵas Mamadııarova (Ońtústik Qazaqstan oblysy) laıyqty dep tanyldy. Olarǵa 50 myń teńge kóleminde yntalandyrý syılyǵy tabystaldy.
Músháıranyń negizgi bólimi Qazaqstan estradasy juldyzdarynyń qatysýymen ótken kontserttik baǵdarlamaǵa ulasty.
Qala deńgeıinde mundaı sharany ótkizýdiń maqsaty - Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý sheńberinde jastar arasynda ulttyq biregeılik pen ulttyq qundylyqtarymyzdy nasıhattaý, jas aqyndardyń shyǵarmashylyǵyn damytýǵa jaǵdaı jasaý, memlekettik rámizderdi nasıhattaı otyryp, jastardy otansúıgishtikke tárbıeleý. Marapattaý rásimine QR Májilisiniń depýtaty Baqytbek Smaǵul men Astana qalasynyń zııaly qaýym ókilderi qatysty.
Aıta keteıik, qalalyq músháıra elorda ákimdiginiń Jastar saıasaty máseleleri basqarmasynyń áleýmettik tapsyrysyn oryndaý aıasynda ótken bolatyn.
