Elordada jaryqsyz qalǵan turǵyn úılerge elektr men sý berý qalpyna keltirildi

NUR-SULTAN. QazAqparat – Elordanyń sol jaq jaǵalaýynda, «Ábý-Dabı Plaza» kesheniniń janynda ornalasqan 6 kópqabatty turǵyn úı tutynýshylarynyń elektrmen jabdyqtaý júıesi qalpyna keltirildi, dep habarlaıdy QazAqparat.

Elordanyń sol jaq jaǵalaýyndaǵy birneshe turǵyn úı turǵyndarynyń habarlaýynsha, keshe túnde olardyń úılerinde áýeli elektr jaryǵy óship, odan keıin sorǵylar istemegen soń jylý, sýmen jabdyqtaý júıesi isten shyqqan.

Buǵan deıin «ASTANA-REK» AQ-nyń baspasóz qyzmetine silteme jasap habarlanǵandaı,30 qańtar kúni saǵat 20:58 kezinde «Sol jaǵalaý» qosalqy stansasynyń 10 kV 407-nómirli uıashyǵy apatty jaǵdaıda óshirilgen.

Syǵanaq, Túrkistan jáne Almaty kóshelerindegi 6 turǵyn úıde jaryq óshken.

Esil aýdanynyń 19 adamnan turatyn 5 brıgadasy apat saldaryn joıýǵa jumyldyrylǵan. Olar elektr taratý jelisiniń jumysyn qalpyna keltirýge atsalysty.

«Astana-REK» kezekshi dıspetcheriniń habarlaýynsha, «Apat 10 KV kabeldiń búlinýinen oryn alǵan, al onyń sebebin qazir zerthanada anyqtalyp jatyr».