Elordada jarty jyl ishinde 51 bala bıikten qulaǵan
ASTANA. 2 tamyz. QazAqparat - Ústimizdegi jyldyń І jartyjyldyǵynda Astanada balalardyń bıikten qulaýynyń 51 oqıǵasy tirkeldi.
Bul týraly astana.kz saıtyna elordalyq ІІD baspasóz qyzmetinen habarlady.
«Ústimizdegi jyldyń І jartyjyldyǵynda balalardyń bıikten qulaýynyń 51 oqıǵasy tirkeldi, sonyń ishinde 5 jasqa deıingi balalar arasynda -14, 15 jasqa deıingi balalar arasynda 10 oqıǵa oryn alǵan, budan basqa, 5 bala moskıt torynan qulap, kóz jumǵan», - delingen vedomstvo taratqan aqparatta.
Jyl basynan beri mehanıkalyq aspıratsııa nátıjesinde (óz qusyǵyna shashalý) 4 sábı kóz jumǵan.
Qalalyq balalar aýrýhanasynyń jansaqtaý bólimine «jabyq bas súıek jaraqaty, mıynyń shaıqalýy, qaryn zaqymy» dıagnozymen 2008 jyly týǵan bala jetkizildi. Mamandar balanyń 3-shi qabattan qulaǵanyn anyqtady.
Taǵy da bir jaǵdaı keshki ýaqytta oryn alǵan. Aýrýhananyń jansaqtaý bólimine 4 jasar qyz jetkizildi. Dıagnozy: «jabyq bas súıek jaraqaty, mıynyń shaıqalýy, samaı bóliginde bas súıeginiń negizi synǵan». Ol da 4-shi qabattaǵy terezeden 1-shi qabattaǵy kúnqaǵarǵa qulap, túrli jaraqattar alǵan.
«Balalar kóbinese jandarynda úlkender bolmaǵanda nemese tıisti baqylaý júrgizilmegende baqytsyzdyqqa ushyraıdy. Bul jaǵdaı qas-qaǵym sátte oryn alady»,- delingen aqparatta.
