Elordada jármeńkelerde 600 tonnadan astam ónim satyldy
ASTANA. QazAqparat - Apta saıyn jumadan jeksenbige deıin elordada Astana qalasynyń, Aqmola jáne Qaraǵandy oblystary taýar óndirýshileriniń qatysýymen aýyl sharýashylyq jármeńkeleri ótedi.
Osy aptada 36-shy jármeńke uıymdastyrylady, dep habarlaıdyń ákimdiktiń resmı saıty. Osy kúnge deıin 670 tonnaǵa jýyq ónim satyldy, onyń baǵasy bazardaǵydan 10-15% arzan.
Jármeńke barysynda baqylaýshylar baǵa monıtorıngin júrgizedi. Baǵalardyń negizsiz kóterilýine jol bermes úshin árbir alańda baqylaýshy tarazylar qoıylady. Satylatyn taýarlardyń, ásirese et óniminiń sapasyna basa nazar aýdarylady.
«Bizdiń taraptan ónimniń sapasyn baqylaý boıynsha barlyq qajetti sharalar qabyldanýda. Kúnde tańerteń et ónimderi arnaıy tekserýden ótkiziledi, qala turǵyndary men qonaqtarynan qaýipsizdik maqsatynda veterınarlyq baqylaýdan ótken etti ǵana satyp alýlaryn suraımyz», - deıdi Astana qalasy ákiminiń orynbasary Malıka Bekturova.
Onyń aıtýynsha, qala ákimdigi turaqty epızootıkalyq jaǵdaıdy saqtaý úshin qajetti is-sharalardy qabyldap jatyr. Sonyń ishinde, qala mańyndaǵy mal baqylaýǵa alyndy. «Rýbej» beketterinde turaqty túrde reıdter ótkiziledi. Turǵyn úı alaptaryn aralap, halyq arasynda monıtorıngteý jáne túsindirý jumystary, syrttan ákelingen janýarlardy vaktsınalaý jumystary qolǵa alyndy. Saýda nysandary men mal soıý alańdarynda et ónimderi veterınarlyq baqylaýǵa alynyp, zerthanalarda mindetti túrde veterınarlyq-sanıtarlyq saraptamadan ótkiziledi. Kúmándi ónim anyqtalǵan jaǵdaıda, ony alý jáne joıý sharalary qabyldanady.
Elordalyq bılik qala turǵyndaryna et satyp alý kezinde tıisti sáıkestik sertıfıkatyn nemese synaq hattamasyn talap etýge keńes beredi.
