Elordada «Jarqyra, jaına, Astana!» jyr músháırasy ótedi
ASTANA. 8 naýryz. QazAqparat - Elorda ákimdiginiń qoldaýymen Sáken Seıfýllın murajaıy jáne Qazaqstan Jazýshylar odaǵynyń Astana qalalyq fılıaly «Astananyń 15 jyldyǵy» merekesi qurmetine «Jarqyra, jaına, Astana!» atty ashyq músháıra ótetindigin jarııalady,
dep habarlaıdy kazaitys.kz.
«Táýelsizdik!», «Táýelsiz Qazaqstannyń jańa Astanasy!» degen qasıetti uǵymdardyń qazaq topyraǵyna órken jaıǵanyna kóp bola qoıǵan joq. Arysy Kereı men Jánibekten tartyp, berisi keshegi Kenesary han zamanyna, Jeltoqsan kóterilisine deıin osynaý ulanǵaıyr dalamyzdyń bútindigi men halqymyzdyń azattyǵy jolynda esil erlerimiz etik-pen qan keshti, tulparlarymyz aýyzdyqpen sý ishti. Qar jamylyp, muz tósendi. «Eńký-eńký jer shaldy, egeýli naıza qolǵa aldy». Aqyry, arman adastyrmady, úmit aqtaldy. Ǵasyr toǵysyna taıap, jańa myńjyldyqqa qaraı qadam basqanda, babalar amanaty oryndalyp, bostandyqtyń Kók baıraǵy Qazaq dalasynda qaıta jelbiredi. Arqa tósinde ásem Astanamyz keregesin jaıyp, altyn shańyraǵyn kóterdi.
Bıyl azat Qazaq eliniń elordasy Arqa tósine kóshirilgenine 15 jyl! «Bolar eldiń balasy, on besinde baspyn der...» demekshi, Astanamyz jastyǵyna qaramastan az ǵana jyldyń ishinde álemdik bedelge ıe boldy. Dúnıe júzine áıgili juldyzdy qalalardyń qataryna kirip úlgerdi. Alys-jaqyn órkenıetti eldermen tereze teńestirdi.Túrki áleminiń rýhanı astanasy mártebesin aldy. Beıbitshilik pen kelisimniń, dostyq pen baýyrmaldyqtyń uıytqysyna aınaldy. Namys pen erliktiń, eńbek pen jeńistiń úlgisin kórsetti. Sonyń aıǵaǵy: EQYU sammıtin ótkizdi. San alýan din jetekshileriniń basyn qosyp, quryltaıyn uıymdastyrýdy dástúrge aınaldyrdy. London tórinde kók týymyz san márte jelbiredi. Aldyńǵy qatarly damyǵan elý eldiń qataryna endik. Bárin aıt ta, birin aıt, Astana EHRO-2017 kórmesin óz tórinde ótkizý mártebesin jeńip aldy.
Osynyń bári qıyn da kúrdeli kezeńde el tizginin ustaǵan Nursultan Ábishuly Nazarbaevtyń sarabdal saıasatynyń, qajyrly qaıratynyń arqasy. Mine, endi Táýelsiz Qazaqstannyń osy jańa Astanasyn asqaq shabytpen, ystyq júrekpen jyrlaıtyn, aq túıeniń qarny jarylǵan shýaqty kún, mereıli sát týdy.
«Qazaqstan-2050» Strategııasy jolǵa qoıylyp, táýelsiz Qazaqstan memleketi damýdyń jańa bir kezeńine aıaq basqan tustaǵy «Astananyń 15 jyldyǵyn» toılaýdyń máni men mańyzy da ózgeshe bolmaq. Sondyqtan, músháıra aqyndardan keıingi urpaq sanasynda óshpesteı iz qaldyratyn, tarıh betine altyn árippen aıshyqtalyp jazylatyn, arqaýy myqty, aıtary mol juldyzdy jyrlar kútedi.
Báıgeni táýelsiz Qazaq eliniń ótken kúrdeli tarıhyn, búgingi eren jetistigin, bolashaq uly armanyn ulttyq rýhpen kómkere otyryp, kórkem tilmen kesteleı alǵan aqyndar ıelenedi.
Bas júlde - jeńil avtokólik.
Birinshi oryn - bireý.
Ekinshi oryn - ekeý.
Úshinshi oryn - úsheý.
Yntalandyrý syılyqtary - beseý.
Músháıraǵa esh jerde jaryq kórmegen óleńder, tolǵaýlar, poemalar qabyldanady. Qazylar alqasynyń sheshimi qaıta qaralmaıdy. Júldegerler syılyǵy 2013 jyldyń 1 shildesi kúni Kongress-Holl saraıynda saltanatty túrde tapsyrylady. Báıge alǵan shyǵarmalar «Altyn tamyr» jýrnalynda jarııalanady, ári jeke kitap bolyp basylady.
Eskertý: Astanaǵa kelip-ketý jol shyǵyny men jatar oryn máselesin jeńimpazdardyń ózderi sheshedi. Indeks: 010000, Astana qalasy, Áýezov kóshesi, 20 «A». «Sáken Seıfýllın murajaıy» MKQK. Elektrondy baılanys: Seifullin_museum@mail.ru. Baılanys telefony: (8-7172) 32-84-67, (8-7172) 53-34-03.
