Elordada jaratylystaný ǵylymdary boıynsha jasóspirimder arasyndaǵy IV Halyqaralyq ashyq olımpıada ótýde
Olımpıadaǵa elimizdiń 14 oblysy men Almaty, Astana qalalarynan, sondaı-aq Kókshetaý, Semeı, Óskemen, Taldyqorǵan, Astana qalalaryndaǵy Zııatkerlik mektepterden qazaq jáne orys tilderinde bilim alatyn 21 komanda qatysady. Árbir komanda 3 oqýshydan turady. Jaratylystaný ǵylymdary boıynsha jasóspirimderdiń IV olımpıadasyna qatysýshylar fızıka, hımııa jáne bıologııadan alǵan bilimderi men praktıkalyq biliktilikterin olımpıadanyń teorııalyq jáne eksperımentaldy kezeńderinde synaı alady.
Jyl saıyn olımpıadaǵa qatysýshy komandalar aýqymy keńeıip keledi. Máselen, ótken jyly bilim saıysyna Tájikstan komandasy qatyssa, bıyl Qyrǵyzstan komandalary kelip otyr.
«Qatysýshylar bilim saıysynda kórsetken nátıjelerine sáıkes olımpıadanyń altyn, kúmis, qola medaldarymen marapattalady. Sonymen qatar Olımpıadanyń arnaıy syılyǵymen: «Olımpıadanyń dara (tolyq) jeńimpazy», «Olımpıadanyń dara (tolyq) jeńimpaz - komandasy», «Eń úzdik eksperıment kórsetken komanda» atalymdary boıynsha atalyp ótiledi», - delingen Nazarbaev Zııatkerlik mektepteri derbes bilim berý uıymynyń baspasóz qyzmeti taratqan aqparatta.
