Elordada jappaı tóbeles boldy – kúdiktiler 5 jylǵa sottalýy múmkin
NUR-SULTAN. QazAqparat – Astananyń ortalyq kósheleriniń birinde jappaı tóbeles boldy. Bul týraly QazAqparat qalalyq polıtsııa departmentine silteme jasap habarlaıdy.
15 shilde kúni saǵat 16: 36-da Esil aýdany polıtsııa basqarmasynyń kezekshi bólimine Qabanbaı batyr dańǵylyndaǵy kópirde jappaı tóbeles bolyp jatqany týraly habarlama kelip tústi. Oqıǵa ornyna shyqqan patrýldik polıtsııa polkiniń qyzmetkerleri tóbeleske qatysýshylardyń bárin ustap, polıtsııa bólimshesine ákelgen.
«Tóbelesti 32, 29 jáne 25 jastaǵy jigitter bastaǵan. Jastar «Azııa park» saýda-oıyn-saýyq ortalyǵynyń kólik turaǵynda jolǵa syımaı, sózge kelgen. Kópirge jetken kezde ereges tóbeleske ulasqan. Tóbelesti bastaǵandardyń ústinen «Buzaqylyq» babymen boıynsha qylmystyq is qozǵaldy. Tergeý amaldary júrip jatyr», - deıdi departament mamandary.
Qos tarap ta kóshedegi jol qozǵalysyna kedergi ketirgeni úshin ákimshilik jaýapqa tartylýy múmkin. Al qylmystyq istiń qorytyndysy boıynsha negizgi kináliler bas bostandyǵynan aıyrylýy da yqtımal.
«Tóbeleske qatysýshylarǵa 5 myń AEK-ke deıin aıyppul salynýy múmkin nemese bes jylǵa deıin bas bostandyǵynan aıyrý jazasy berilý yqtımal. Sondaı-aq, ózge kólikterdiń júrisin shektep, jol qozǵalysyn buzǵany úshin kólik ıeleri Ákimshilik quqyq buzý týraly kodekstiń 614-baby boıynsha ákimshilik jaýapkershilikke tartyldy. Nur-Sultan qalasynyń polıtsııa departamenti avtokólik ıelerine qoǵamdyq tártipti buzbaýǵa shaqyrady», - delingen departamenttiń málimetinde.
