Elordada jańadan qurylǵan Qazaq tili men ádebıeti muǵalimderiniń qaýymdastyǵy alǵashqy basqosýyn ótkizdi
ASTANA. Qańtardyń 19-y. QazAqparat /Gúlmıra Álıakparova/ - Búgin Astanadaǵy Prezıdenttik Mádenıet ortalyǵynda jańadan qurylǵan Qazaq tili men ádebıeti muǵalimderiniń qaýymdastyǵy (QTÁM) alǵashqy basqosýyn ótkizip, «Qazaq tilin oqytýdyń ınnovatsııalyq tehnologııalary» taqyrybynda semınar ótkizdi,
dep habarlaıdy QazAqparat.
Jańa qoǵamdyq qurylym Memlekettik tildi damytý Prezıdenttik qorynyń bastamasymen jáne qoldaýymen ótken jyly quryldy. Onyń Qamqorlyq keńesiniń músheligine QR Parlamentiniń depýtattary, qoǵam qaıratkerleri, Prezıdenttik qor men Astana qalalyq bilim basqarmasynyń ókilderi endi.
Memlekettik tildi damytý Prezıdenttik qory dırektorynyń orynbasary Serik Erǵalıdiń atap kórsetkenindeı, búginde tek pán retinde oqytylyp otyrǵan qazaq tilin - qarym-qatynas quralyna aınaldyratyn kez jetti. Al ony kommýnıkatıvti qural retinde damytý úshin bul salaǵa muǵalimderdi daıarlaýmen shektelý - jetkiliksiz. Sondyqtan Qaýymdastyqtyń nysanaly toby retinde muǵalimder, oqýshylar (qazaq jáne orys tildi) jáne ata-analar alynyp otyr.
QTÁM Qaýymdastyǵynyń negizgi maqsaty - qazaq tiliniń kúndelikti ortada qoldanylý aıasyn keńeıtý maqsatynda balalardyń ózderi men ustazdardyń usynǵan jańashyldyq tehnologııalary men ádisterine, ozyq ınnovatsııalyq ıdeıalaryna qoldaý kórsetý, sondaı-aq - memlekettik tildi meńgermegen oqýshylardyń ata-analarymen jumys jasaý bolyp tabylady.
S.Erǵalıdiń aıtýynsha, Qazaqstanda orys tildi jáne aǵylshyn tildi muǵalimderdiń Qaýymdastyqtary birshama ýaqyt buryn qurylyp qoıǵan. Solaı olar týyndaǵan problemalaryn jumyla sheship, quzyrly organdardan qoldaýlaryn qıyndyqsyz taýyp keledi. Al qazaq tildi muǵalimder óz problemalarymen jeke qalyp, tildi úıretýge túıitkilderdi óz betterimen sheship otyr.
«Sondyqtan, tildik ortany keńeıtý máselesin birigip qolǵa alýymyz kerek. Qazaq tilin pán retinde ǵana oqytpaı, sol halyqtyń mádenıetin sińirýmen baılanystyrý qajet. Sol sebepti qazir tildi úıretýdegi strategııalyq baǵytymyzdy ózgertýimiz kerek», - deıdi S.Erǵalı.
Al strategııalyq baǵytty ózgertý - Qaýymdastyqtyń nysanaly toptary úshin, ásirese muǵalimderge dóńgelek ústelder men semınarlar uıymdastyryp, olardyń tvorchestvolyq áleýetteriniń ashylýyna jol berý arqyly qolǵa alynbaq.
