Elordada Jańa jylda jańa nysandar paıdalanýǵa berilmek
ASTANA. 10 jeltoqsan. QazAqparat - Elimizdiń bas shaharynda halyq sany kún sanap artýyna oraı jańa ǵımarattar da kóptep boı kóterýde. Olar - kóbine-kóp bilim ordalary, medıtsına, saýda oıyn-saýyq ortalyqtary men turǵyn úı keshenderi, dep habarlady Astana qalasynyń resmı saıty.
Atap aıtqanda, jaqynda ǵana №6 qalalyq emhana Ońtústik Shyǵys shaǵyn aýdanynda jańadan paıdalanýǵa berilgen ambýlatorııalyq-emhana keshenine kóshti. Munda aýysymyna 350 eresek adam men 150 balany qabyldaıdy. Emhanalyq keshen jańa qurylǵylarmen jabdyqtalǵan. Mammografııalyq qurylǵy, kompıýterlik tomografııa, ýltradybysty jáne fýnktsıonaldy dıagnostıka, 3 ota jasaıtyn bólme bar. Atalǵan emhanada onkologııalyq, hırýrgııalyq, gınekologııalyq, ýrologııalyq ota túrleri jasalady. «Bul jerde ár túrli otalar jasaýǵa bolady. Mysaly, ishtiń jaryǵyna, shattyń jaryǵyna, sannyń jaryǵyna. Mundaı otalardy arnaıy quraldar arqyly kesip emes, tesip jasaımyz», deıdi ambýlatorlyq-hırýrgııa bóliminiń meńgerýshisi Qýandyq Jumanqulov.
Astana qalasy boıynsha jyl saıyn 18 000-ǵa jýyq náreste dúnıege keledi. Al, olardyń zaman talabyna saı ósip-ónip, tálim alýy da nazardan tys qalmaıdy. Ázirge qalada 52 jekemenshik, 69 memlekettik balabaqsha bar. Al, 1 qańtardan bastap Saraıshyq kóshesinde taǵy 2 balabaqsha óz jumysyn bastaýǵa daıyn. Keler jyly olardyń sany taǵy arta túsedi.
Astana qalalyq bilim basqarmasynyń bastyǵy Ásıma Bımendınanyń aıtýynsha, 2013 jyly 6 balabaqshanyń qurylys jumystary jalǵasyp, 4 balabaqshanyń qurylysy bastalady. «Sonymen, barlyǵy memlekettik 10 balabaqsha ashylady dep kútilýde. Biraq ta qazir jekemenshik balabaqshanyń da sany artýda. Ol da úlken kómek», - dedi ol.
Keler jyl mektep oqýshylary úshin de qýanyshpen bastalady. Naqtysyn aıtsaq, 600 oryndyq №19 orta mekteptiń jańa ǵımaraty paıdalanýǵa berilýge daıyn. Bul qazir 889 oqýshy oqyp, 400 oryn tapshylyǵy aıqyn sezilip otyrǵan túıtkildi máseleni sheshýge múmkindik bereri sózsiz. Aıta ketý kerek, jańa ǵımaratta hımııa, ınformatıka, bıologııa, fızıka kabınetteri de qarastyrylǵan.
Astanada búginde 86 663 mektep oqýshysy bilim alady. Alaıda, jaqyn aımaqtan qonys aýdarýshylardyń kóptigine baılanysty mektepterde oryn jetispeýshiligi máselesi týyndaıdy. Osy máseleni sheshý úshin 2013 jyly 3 mektep, 2014 jyly 6 mektep, 2015 jyly 6 mektep salynatyn boldy. Aıta ketý kerek, atalǵan mektepter - 1200 oryndyq.
