Elordada Jańa jylda 125 jedel járdem brıgadasy kezekshilik etti
Jańa jyl túni habarlamalardy 13 dıspetcher qabyldady jáne turǵyndarǵa feldsherler men júrgizýshilerden quralǵan 355 maman kómek kórsetý úshin shyqty. Barlyǵy 125 jedel medıtsınalyq kómek brıgadasy 1 qańtarǵa qaraǵan túni azamattardy shaqyrýǵa shyqty, onyń ishinde MSAK uıymdarynyń brıgadalary da bar.
Brıgada feldsheri Almat Azatjanov jańa jyl túngi aýysymy qalaı ótkenin aıtty.
«Bul jolǵy aýysymda brıgadamen shaqyrtýǵa bes ret shyqtyq. Onyń kez kelgeninde qabyldaý bólmelerine nemese jaraqat pýnktine jedel jetkizdik. Onda dárigerler ylǵı da daıyn ári jyldam kómek kórsetedi. Jalpy, aýysym tez ótedi. Jumysym ózime unaıdy, sol sebepti otbasymmen birge bolmaǵanyma ókinbeımin. Alda áli de ýaqyt bolady», – deıdi feldsher.
Qalalyq aýrýhanalardyń bári kúsheıtilgen rejımde jumys istedi. Ol úshin qosymsha palatalar men tósek-oryndaryn uıymdastyrý qarastyrylǵan. Máselen, Jańa jyl qarsańynda elordalyq klınıkalardyń 200-ge jýyq medıtsına qyzmetkeri kezekshilikte boldy. Onyń quramynda barlyq kásibı mamandar boldy: travmatologtar, hırýrgtar, akýsher-gınekologtar, reanımatologtar jáne basqalar.