Elordada jańa jyl túninde 16 sábı dúnıege keldi
NUR-SULTAN. QazAqparat - Elordada jańa jylda 16 sábı dúnıege keldi. Bul týraly QazAqparat qalalyq Qoǵamdyq densaýlyq saqtaý basqarmasyna silteme jasap habaraıdy.
«Qalalyq qoǵamdyq densaýlyq saqtaý basqarmasynyń málimetinshe, jeltoqsannyń 31-inen qańtardyń 1-ine qaraǵan túni elordada 16 náreste dúnıe esigin ashty. Jańa jyldyń birinshi kúni kópbeıindi qalalyq aýrýhanalardyń akýsherlik bloktarynda 6 qyz jáne 10 ul bala týdy», - delingen basqarma habarlamasynda.
Basqarma ókilderiniń aıtýynsha, orta eseppen bir táýlik ishinde 80-90 balanyń dúnıege keledi dep kútilýde.
Sonymen birge, jańa jylda Nur-Sultannyń 125 jedel járdem brıgadasy kezekshilik atqaryp, 355 feldsher men júrgizýshi shaqyrtýlarǵa shyqqan. Onyń ishinde alǵashqy medıtsınalyq sanıtarlyq kómek uıymdarynyń brıgadalary da bar.
Eske salsaq, 2030 jylǵa qaraı halyqtyń 27,4%, al 2050 jylǵa qaraı 36% astamy respýblıkalyq mańyzy bar Nur-Sultan, Almaty jáne Shymkent qalalarynda turatyn bolady.