Elordada jańa ýrbanıstıkalyq jobalar júzege asady
ASTANA. KAZINFORM – Elordada qalanyń sáýlettik kelbetin saqtaý jáne jaqsartý máseleleri talqylandy. Qalalyq máslıhattyń turaqty komıssııa otyrysynda syrtqy jarnama, ǵımarat qasbetteri men kóshe jaryǵyn birizdendirý máseleleri kóterilip, Qalalyq sáýlet, qurylys jáne jer qatynastary basqarmasynyń basshysy Altynbek Ahmetov baıandama jasady.
Spıkerdiń aıtýynsha, elordada qalanyń biryńǵaı sáýlettik stılin qalyptastyrý maqsatynda arnaıy brendbýk ázirlengen.
– Bul qujat qalalyq orta elementterin jobalaý men bezendirýde biryńǵaı tásildi belgileıdi. Qalada lıýktar, kóshe jıhazdary, shamdar, mańdaıshalar men qasbetterge deıin barlyq usaq detalge erekshe mán beriledi. Qala kúndiz de, túnde de estetıkalyq tartymdylyǵyn saqtaýy tıis. Sondyqtan kúndizgi jaryq shamdary dep atalatyn uǵym paıda boldy. ıAǵnı jaryq baǵanalary tek jaryq kózi retinde emes, sáýlettik element retinde de qarastyrylady. Sonymen qatar ǵımarattarǵa jyly reńktegi sáýlettik jaryq ornatý jumystary júrgizilip jatyr. Búginde 200-den astam qoǵamdyq jáne turǵyn úı nysandary jyly jaryqpen bezendirilgen. Bul túngi qalanyń kórkem ári jaıly atmosferasyn qalyptastyrýǵa yqpal etedi, – dedi Altynbek Ahmetov.
Onyń aıtýynsha, qysqy kezeńde turǵyndar úshin jaıly qoǵamdyq keńistikter qalyptastyrýǵa erekshe kóńil bólinip otyr. Byltyr qys mezgilinde 30 qalalyq aýmaq pen 60-tan astam demalys orny bezendirilgen. Aǵashtar sándelip, jaryq ınstallıatsııalar ornatylyp, kóshelerdi bezendirý jumystary júrgizilgen. Sondaı-aq syrtqy jarnama men sáýlettik bezendirýge qoıylatyn biryńǵaı standarttar engizilgen. Kóshe keńistigin vızýaldy shýdan tazartý maqsatynda talapqa saı kelmeıtin jarnama konstrýktsııalary men mańdaıshalardy alý jumystary júıeli túrde júrgizilip jatyr. Bul baǵyttaǵy jumysty «Astana Jarnama» kommýnaldyq memlekettik mekemesi úılestiredi.
–– «Astana Jarnama» mekemesi syrtqy jarnamanyń ornalastyrylýyna baqylaý jasaıdy. 2025 jylǵy 25 tamyzdaǵy jaǵdaı boıynsha jarnama taratýshylardan 653 habarlama kelip tústi, onyń ishinde 348-i esepke alyndy, al 305-ine eskertý berildi. Sondaı-aq 2025 jyldyń naýryzynan bastap mańdaıshalardy ornalastyrý boıynsha 1623 habarlama túsip, onyń 1197-si qabyldandy, 426-sy sáýlettik kelbetke sáıkes kelmegeni úshin keri qaıtaryldy, – dedi basqarma basshysy.
Ol óz sózinde jyldyń jeti aıynda qala kósheleri men ǵımarat qasbetterin vızýaldy lastan tazartý aıasynda 16 256 jarnama elementi men mańdaısha alynyp tastalǵanyn, budan bólek, elordada syrtqy jarnamaǵa tólem jasaıtyn tulǵalar týraly málimetter Astana qalasynyń Memlekettik kirister departamentine joldanyp, jalpy 13 mlrd teńgege tólem jasalǵanyn atap ótti.
– «Astana Jarnama» men Ýrbanıstıka ortalyǵynyń jumystary oń nátıje berip otyr. Osy tájirıbeni eskere otyryp, jańa qurylym qurý josparlanyp otyr. Ol qurylym tek ýrbanıstıka jáne qalanyń syrtqy kelbetimen aınalysady. Qazir tıisti zańdy tulǵany tirkeý jumystary júrgizilip jatyr, – dedi Altynbek Ahmetov.
Sonymen qatar basqarma basshysy elordadaǵy birqatar turǵyn úılerdiń qasbetterin jańǵyrtý jumystary júrgiziletinin atap ótti. Máselen, «Nursaıa» turǵyn úı kesheniniń qasbeti jańartylyp, zamanaýı materıaldarmen qaıta qaptalmaq. Budan bólek, Kenesary jáne Beıbitshilik kóshelerindegi eski ǵımarattardyń qasbetteri jańartylyp, qalaǵa úılesimdi ári zamanaýı beıne berilmek.
– Bıyl 180 qoǵamdyq jáne aýlalyq keńistikti abattandyrý josparlanǵan. Kóshe boıyndaǵy jaıaý júrginshi aımaqtary, velojolaqtar, jaryqtandyrý jáne kógaldandyrý tolyq qamtylady. Munyń jarqyn mysaly – Máńgilik El, Syǵanaq, Beıbitshilik, Kenesary, Abaı, Mambetova, Sátpaev kósheleri. Sondaı-aq Ýlytaý alleıasy tolyq jańartylyp, Trıýmf arkasy men Botanıkalyq baqty biriktirdi. Qazaq Eli alańy da abattandyrylyp, birkelki sáýlettik stıl qalyptasty, – dedi Ahmetov.
Onyń aıtýynsha, qalada iri saıabaq klasterleri men skverlerdiń damýyna da aıryqsha nazar aýdarylyp otyr. Mysaly, Beıbitshilik jáne kelisim saıabaǵy abattandyryldy, buǵan deıin ıgerilmegen jerler – mysaly, «Kerýen» saýda úıi mańyndaǵy bos keńistik – zamanaýı demalys alańyna aınalǵan.
– Bul sharalar barlyǵy turǵyndarǵa qolaıly ári jaıly qalalyq orta qalyptastyrýdy maqsat etedi. Meniń baıandamam osy, suraqtar kelesi spıkerlerdiń sózinen keıin qoıylady, – dep sózin qorytyndylady Altynbek Ahmetov.
Buǵan deıin, Astanada jańa káriz tazartý qurylysy salynyp jatqanyn jazǵanbyz.