Elordada jańa týǵan ár náresteniń atyna bir aǵashtan otyrǵyzylatyn bolady
ASTANA. QazAqparat - Astananyń tabıǵı resýrstar jáne tabıǵatty paıdalanýdy retteý basqarmasy «Rýhanı jańǵyrý» baǵdarlamasynyń «Sanaly Azamat» jobasy aıasynda 2018 jyldyń sońyna deıin «Jańa týǵan ár nárestege bir aǵashtan» atty ekologııalyq aktsııany ótkizedi, dep habarlaıdy elorda ákimdiginiń resmı saıty.
2018 jyldyń alǵashqy kúnderinen bastap elordanyń densaýlyq saqtaý nysandarynyń perzenthana bólimderi dúnıe esigin ashqan nárestelerge ishinde otyrǵyzylǵan aǵashtardyń syzbasy men quttyqtaý býkletteri bar konvertterdi tabystaýda. Astananyń tabıǵı resýrstar jáne tabıǵatty paıdalanýdy retteý men densaýlyq saqtaý basqarmalary birlesip júzege asyryp jatqan «Jańa týǵan ár nárestege bir aǵashtan» aktsııasy qoǵamdy qorshaǵan ortany qorǵaýǵa, tarıhı dástúrdi saqtaýǵa shaqyrýdy, ekologııalyq bilimdi is júzinde nasıhattaýdy, óskeleń urpaqtyń qorshaǵan ortaǵa, salaýatty ómir saltyna degen súıispenshilik sezimin oıatýdy, qoǵamnyń ekologııalyq mádenıetin arttyrýdy, jastardy el ıgiligi úshin ıgi ister jasaýǵa shaqyrýdy kózdeıdi.
Ekologııalyq aktsııany uıymdastyrýshylardyń aqparatyna qaraǵanda, elordada týǵan nárestelerdiń qurmetine otyrǵyzylǵan kóshetter «Astana qalasynyń jasyl beldeýiniń» aýmaǵynda ornalassa kerek.
«Ekologııalyq naýqanǵa daıyndyq 2017 jyly bastaldy. Onyń aıasynda quttyqtaý hattaryn, nómirleri bar aǵashtardyń ornalasý shemalaryn ázirleý, «Astana qalasynyń jasyl beldeýiniń» aýmaǵynda 4-5 jyl buryn otyrǵyzylǵan bıiktigi bir metrge jýyq kóshetter bar ýchaskelerdi anyqtaý sııaqty qyrýar jumys atqaryldy.
1 aqpandaǵy jaǵdaıǵa sáıkes jasyl beldeýdiń oryndaý syzbasy boıynsha «Qarqaraly» tas joly jaǵynan ornalasqan «qarapaıym shegirshin» kóshetteri bar birinshiden jetinshige deıingi yqtyrmalar anyqtaldy. Ekologııalyq aktsııaǵa barlyǵy 35 yqtyrma bólindi», - dep málimdedi Astananyń tabıǵı resýrstar jáne tabıǵatty paıdalanýdy retteý basqarmasynda.
Aıta keteıik, «Jańa týǵan ár nárestege bir aǵashtan» aktsııasynyń basynan Astana qalasynyń №1, №2, №3 Perınataldy ortalyqtarynda dúnıege kelgen sábılerdiń ata-analaryna 1704 quttyqtaý haty tapsyryldy.
