Elordada jańa teatr ashyldy

NUR-SULTAN. QazAqparat - Elordada mýzykalyq jas kórermen teatry saltanatty túrde ashyldy, dep habarlaıdy QazAqparat tilshisi.

Jańa teatrdyń ashylýy Táýelsizdik merekesi qarsańynda jáne uly aqyn Abaıdyń 175 jyldyǵyna oraı uıymdastyrylyp otyr.

«Qasterli mereke qarsańynda mádenıet salasynda jaǵymdy jańalyq oryn alyp otyr. Qalada birneshe teatr bar, biraq jas jetkinshekterge arnalǵan teatr joq eken. Osy oraıda mádenıet jáne óner mamandarymen aqyldasyp jańa teatr qurýdy jón sheshtik. Sonymen qatar, bul teatrdyń ashylýy QR Mádenıet jáne sport mınıstrliginiń tarapynan da qoldaý tapty», -dedi Nur-Sultan qalasynyń ákimi Altaı Kólginov teatrdyń ashylý saltanatynda.

Óz jumysyn bıyl 1 qazanda bastap ketken teatrǵa kastıng arqyly 50-den astam jas ártis tańdap alyndy.

«Árıne ár teatrdyń óz ereksheligi bolý kerek, bul teatr óziniń mýzykalyq janrymen erekshelenedi. Bizdiń teatrdyń analogy tek Máskeýde ǵana bar. Maqsat - jasóspirimder men jastardy ónerdi súıýge úıretý, baýlý. Olardyń boıyna mýzykalyq, estetıkalyq qasıetterdi sińirý. Aldaǵy ýaqytta jańa teatr sahnasynda álemdik jáne otandyq týyndylar qoıylatyn bolady. Jalpy búginde Nur-Sultan qalasynda qalalyq deńgeıde 6 jáne respýblıkalyq deńgeıdegi 3 teatr bar», - dedi Nur-Sultan qalasy mýzykalyq jas kórermen teatrynyń dırektory Ashat Maemırov.

Mýzykalyq jas kórermen teatry shymyldyǵyn M. Áýezovtiń «Abaı-Toǵjan» mýzykalyq dramasymen ashty.

Qoıylymda Abaıdyń rólin jas ártis Aıan Ótepbergen somdasa, al onyń ǵashyǵy Toǵjandy Arelına Amangeldıeva oınady.

Sondaı-aq, Abaıdyń anasy Uljannyń rólin 71-shi Kann halyqaralyq kınofestıvaliniń jeńimpazy, tanymal aktrısa Samal Eslıamovaǵa somdaý buıyrdy.

Aıta ketsek, atalǵan jańa teatr elordadaǵy Q. Qýanyshbaev atyndaǵy memlekettik akademııalyq qazaq mýzykalyq teatrynyń burynǵy ǵımaratyna ornalasty.