Elordada jańa servıstik qyzmet iske qosyldy
NUR-SULTAN. QazAqparat – iKOMEK109 keri baılanys servısin jaqsartý maqsatynda qala turǵyndaryn SMS-habarlandyrý boıynsha jańa servısti iske qosty, dep habarlaıdy QazAqparat.
«iKOMEK109 qalalyq monıtorıng jáne jedel áreket etý ortalyǵy elorda turǵyndarymen jáne qonaqtarymen keri baılanys servısin jaqsartý maqsatynda Biryńǵaı baılanys ortalyǵyna 1-0-9 qysqa nómiri arqyly berilgen ótinishter boıynsha SMS-habarlandyrý qyzmetin iske qosady. Atalmysh SMS-habarlandyrýlar turǵyndardy ótinishterdiń oryndalý dárejesi týraly ýaqytyly habardar etýge múmkindik beredi. Ótinishtiń atqarylý dárejesin egjeı-tegjeıli qaraý úshin qalanyń iKOMEK.city portalyna ótý qajet. Ótinish sheshimimen tanysqannan keıin turǵynǵa pikir qaldyryp, oryndalǵan jumystar sapasyn baǵalaý usynylady», - delingen elorda ákimdiginiń iKOMEK109 Qalalyq monıtorıng jáne jedel áreket etý ortalyǵy málimetinde.
Sonymen qatar, árbir ótinishke kirý kody keledi, ol ýaqyt óte kele ótinishtiń oryndalý dárejesin qaıta qaraýǵa múmkindik beredi. Ol úshin portal arqyly ótinishtiń SD men kirý kodyn engizip, atqarylý dárejesin tekserý qajet. Bul jańashyldyq 1-0-9 qysqa nómirine uıaly telefonnan qońyraý shalý arqyly ótinish berýdi jón kóretin turǵyndarǵa ótinish boıynsha sheshimmen onlaın rejimde tanysýǵa múmkindik usynady.
Esterińizge sala keteıik, ótinishti balama kózder (WhatsApp jáne Telegram chat-bottary, iKOMEK109 mobıldi qosymshasy nemese elorda ákimdiginiń saıty) arqyly bergen jaǵdaıda ótinishtiń oryndalý dárejesi týraly habarlandyrýlardy turǵyndar avtomatty túrde alady.
