Elordada jańa oıyn alańdary salynady
NUR-SULTAN. QazAqparat - Jaqynda Nur-Sultanda 145 aýlalardy abattandyrý bastaldy, dep habarlaıdy elorda ákimdiginiń resmı saıty.
Qazaqstan astanasynda jaz kelisimen aýlalardy abattandyrý jumystary bastalady, ıaǵnı jańa oıyn alańdary paıda bolyp, eskileri jańartylady. Trenajerlar, shaǵyn sáýlet formalary ornatylady. Elorda ákimdigi oıyn alańdarynyń qaı aýdanda jáne qaı jerlerge salynatyny, sondaı-aq qandaı abattandyrý jumystary júrgiziletinin habarlady.
ALMATY AÝDANY
Bul aýdanda 387 aýla bar. 2020 jyly 33 aýlanyń aýmaǵyn kórkeıtý josparlanǵan. Qordaı kóshesi №75 úı men K. Ázirbaev kóshesindegi № 10 úıdiń aýlalary 2020 jyly abattandyrý jumystarynyń josparyna engizildi. Qosymsha shaǵyn sáýlet formalary men jattyǵý quraldaryn ornatý maýsym aıynda bastalady. Aınakól kóshesindegi №56, 56/1, sondaı-aq R. Qoshqarbaev dańǵyly boıyndaǵy №45, 45/1 úılerdiń aýlalarynda keshendi kóriktendirý jumysy júrgizilip, kólik turaǵy, sporttyq jáne balalarǵa arnalǵan oıyn alańy salynady. Jóndeý jumystaryn maýsym aıynda bastaý josparlanǵan. Ǵ.Mustafın kóshesindegi №15/2 úıdiń aýlasyndaǵy sport alańyna bıyl aǵymdaǵy jóndeý júrgiziledi. Buǵan qosa, T.Júrgenov kóshesindegi №74 mekteptiń aýdanynda gúlzardyń qurylysy bastalyp, oǵan shaǵyn sáýlet formalaryn ornatyp, jaıaý júrginshilerge arnalǵan jol tósep, kógaldandyrý kózdelip otyr.
BAIQOŃYR AÝDANY
Bıyl aýdandaǵy «Jastar» shaǵyn aýdany, Abaı dańǵyly, A.Baraev, Omarov, Otyrar jáne t.b. kóshelerdiń boıyndaǵy 50 aýlany abattandyrý josparlanǵan. Jobaǵa sáıkes balalarǵa arnalǵan eki oryndyq átkenshek, serippeli terbetkishter, qum salǵysh, sporttyq jattyǵý quraldary, shaǵyn sáýlet formalary ornatylady. Aýdan aýmaǵynda 235 aýla bar, búginde onyń 67-sin jańartý qajet. Aǵymdaǵy jyly 67 aýlanyń 50-in jóndeý kózdelip otyr.
ESІL AÝDANY
Aýdanda 399 aýla bar. Bıyl 22-si abattandyrylyp, adamdar úshin qaýipsiz jáne sertıfıkattalǵan shaǵyn sáýlet formalary ornatylady. Qoǵamdyq keńistik aıasynda bir aýmaqta jáne 20 aýlada bir oıyn alańyn jabdyqtaý jospary bar.
SARYARQA AÝDANY
Bul aýdanda 540 aýla bar. 2020 jyly 40 aýlanyń aýmaǵyn kórkeıtý josparlanǵan. Aýdanda barlyǵy 540 balalar alańy bolsa, onyń 10% jańartý qajet. Qazirgi kúni aýdandaǵy aýlalardy abattandyrý qyzmetin kórsetý boıynsha memlekettik satyp alýlar baıqaýyn ótkizýge daıyndyq júrgizilýde.
