Elordada jańa kópshilikke arnalǵan oryndar paıda bolady
NUR-SULTAN. QazAqparat - Elordanyń Ýrbanıstıka ortalyǵy qala turǵyndarymen qoǵamdyq keńistikti abattandyrý boıynsha qoǵamdyq talqylaýlar ótkizedi. Osyndaı kezdesýlerdiń qorytyndysy boıynsha Beısekbaev jáne Seıfýllın kóshelerindegi jańa alańdardyń eskızi daıyndalady, dep habarlaıdy qala ákimdiginiń resmı saıty.
Vorkaýt-aımaq, túrli jattyǵý qurylǵylary bar sport-aımaq, ıtterdi serýendetýge arnalǵan alań. Aty atalǵan oryndar Beısekbaev kóshesi 21, 21/1 jáne Seıfýllın kóshesi 69, 69/2 úıleriniń janyndaǵy aýla keńistiginiń tujyrymdamalyq sheshiminde qarastyrylǵan. Mundaı sheshimdi qala turǵyndary men Ýrbanıstıka ortalyǵynyń ókilderi qabyldady.
Joba aıasynda birneshe oıyn alańy, otyratyn oryndary bar tynysh jer, kıim keptirýge arnalǵan oryn, kólik turaǵy kózdelgen. Sonymen qatar, aýmaqty kógaldandyrý da josparlanyp otyr. Jobany bıyl iske asyrý josparlanýda. Jumys «Nur-Sultan – jaıly qala» sheber-jospary boıynsha júrgizilip jatyr.
Qoǵamdyq talqylaý – aýlany birige otyryp jobalaýdyń bir bóligi.
«Esterińizge sala keteıik, belsendilerdiń ýrbanıstermen birlesken jumysynyń máni – turǵyndar óz aýlasynda qandaı ózgerister bolǵanyn anyqtaıdy. Sonyń negizi boıynsha tilekterge súıene otyryp, jobalyq sheshim jasalyp, ıdeıa júzege asyrylady. Jobalaý aldynda elordalyq ýrbanıster saýalnama júrgizip, qala turǵyndarynyń ótinishin jınaıdy. Turǵyndarmen kezdesýlerde komandalyq dızaın-oıyn ótkiziledi. Nátıjesinde, jańa qoǵamdyq keńistikti jaılastyrý boıynsha eskızdik usynys paıda bolady», – dep atap ótti ýrbanıstıka ortalyǵynyńókilderi.
