Elordada jańa hokkeı korty ashyldy
ASTANA. QazAqparat - Hokkeıshiler men konkı tebýdi súıetinder úshin Astanada jańa kort quıyldy, ol Saryarqa dańǵylynda «Astana» sport kesheniniń qasynda ornalasqan. Nysannyń ashylýyna «Saryarqa» aýdanynyń ákimi Arman Turlybek, «Barys» hokkeı komandasynyń kapıtany «Barys» Brendon Bochenskı, jas «barystar» men qala turǵyndary qatysty.
«Búgin bizdiń aýdanda mereke - biz ashyq aspan astynda alǵash ret kásipqoı hokkeı klýbyn ashyp otyrmyz. Memleket basshysy buqaralyq sporttyń damýyna erekshe kóńil bóledi, árbir turǵynǵa sporttyq ınfraqurylym qoljetimdi bolsyn deıdi. Osy kort tegin negizde hokkeı oınaýǵa arnalǵan, qalanyń kez kelgen turǵyny kelip, oınap, konkı tebe alady»,- dedi Arman Turlybek.
Sonymen qatar, aýdannyń aýmaǵynda alty muz aıdyny ashyldy. Olardyń barlyǵy buqaralyq sporttyń damýyna jáne turǵyndardyń densaýlyǵyn nyǵaıtýǵa qyzmet etedi.
Ashyq aspan astyndaǵy arenanyń ashylýymen astanalyqtardy Brendon Bochenskı de quttyqtady.
«Eń aldymen, osy arenanyń ashylýyna meni shaqyrǵandaryńyz úshin alǵys aıtamyn. Ózim de osyndaı muzdyń ústinde oınap, eseıdim, barlyq jastarǵa sáttilik pen jaqsylyq tileımin», - dedi «Barys» HK kapıtany.
Sóz sońynda hokkeıshi aýdan ákimine ataýly hokkeı taıaǵyn tabys etip, jankúıerlermen sýretke tústi.
