Elordada jańa bilim berý platformasy tanystyryldy
ASTANA. KAZINFORM – Elordada ınklıýzıvti bilim berý salasyndaǵy halyqaralyq úzdik tájirıbelerdi jınaqtaıtyn biregeı analıtıkalyq zertteý ortalyǵy óz jumysyn bastady.
Munda ǵalymdar men PhD doktoranttar erekshe qajettiligi bar balalarǵa arnalǵan dıagnostıkalyq sessııalar ótkizip, ǵylymı negizdelgen ádistemelerdi synaqtan ótkizedi.
Zertteý jumystaryna Stenford ýnıversıtetiniń Aýtızm ortalyǵy (Stanford University Autism Center) men Kalıfornııa ýnıversıtetiniń (UCLA) jetekshi professorlary keńesshi retinde tartylǵan. Ortalyqta arnaıy jabdyqtalǵan eki zerthana jumys isteıdi. Munda Gızella aınasy men beınebaqylaý júıesi ornatylǵan, bul mamanǵa balamen tikeleı baılanysqa túspeı-aq, onyń oıyn kezindegi minez-qulqyn, qozǵalys daǵdylaryn jáne zeıinin syrttaı baqylaýǵa múmkindik beredi.
Ortalyqtyń jumys baǵyty úsh kezeńnen turady: balanyń ortaǵa beıimdelýi, ata-anany nusqaýlyqpen qamtý jáne tikeleı ońaltý sabaqtary. Sonymen qatar, joba aıasynda muǵalimderge arnalǵan ınteraktıvti bilim berý platformasy iske qosyldy.
— Biz óńirlerdegi mektepter men balabaqshalardan úlken suranys bar ekenin baıqadyq. Búgingi tańda osy platforma arqyly 300-den astam pedagog ınklıýzııa quraldaryn meńgerip shyqty. Platformanyń ereksheligi — munda teorııamen qatar, zerthanadaǵy sabaqtardy tikeleı efırde kórip, tájirıbe jınaqtaýǵa bolady. Bul tipti shalǵaı aýyldaǵy stýdentke de álemdik deńgeıdegi ádistemelerdi meńgerýge jol ashady, — deıdi joba jetekshisi, Ásem Tájıeva.
Sondaı-aq, otandyq zertteýshiler balalardyń emotsııasyn bildirýine kómektesetin «Sezimder álemi» atty arnaıy kitap shyǵardy. Bul basylym sóıleý qabileti shektelgen balalar úshin balamaly qarym-qatynas quraly retinde qyzmet etedi. Qazirgi ýaqytta joba aıasynda joǵary oqý oryndarymen birlesip, bolashaq pedagogtardy ınklıýzıvti synyptarda jumys isteýge baýlıtyn oqý baǵdarlamalary engizilip jatyr.
Oqytý baǵdarlamasy «Teach for Kazakhstan» qoǵamdyq qorymen jáne Qozybaev atyndaǵy Soltústik Qazaqstan ýnıversıtetimen seriktestik aıasynda tekseristen ótken. Qazirgi tańda platformada 8 arnaıy kýrs qoljetimdi. Onda beınesabaqtar, kvest-tapsyrmalar men muǵalimniń jumysyn jeńildetetin ınteraktıvti ádister qamtylǵan.
Ortalyq mamandarynyń aıtýynsha, zerthanadaǵy jumys barysynda balalardyń motorıkalyq daǵdylary men qarym-qatynas deńgeıine qatysty mańyzdy derekter jınaqtalady. Bul aqparattar bolashaqta jasandy ıntellekt júıesine júktelip, ár balaǵa arnalǵan derbes ońaltý baǵdarlamasyn avtomatty túrde jasap shyǵarýǵa negiz bolady.
— Mundaı jobalardyń mańyzy zor, óıtkeni olar bilim berýden bólek, erekshe balasy bar otbasylardyń áleýmettik oqshaýlanýyna jol bermeıdi. Eger muǵalim daıyn bolsa, bala mektep ortasyna tez beıimdeledi. Bul — memlekettiń áleýmettik saıasatyn júzege asyrýdaǵy mańyzdy qadam, — dep atap ótti NU Impact Foundation basqarma tóraǵasy Saıan Nıýsýpov.
Aıta keteıik, buǵan deıin Qazaqstanda alǵash ret ınklıýzıvti bilim berý jónindegi álemdik kongress ótken bolatyn.