Elordada jańa álipbıge kóshý jaǵdaıyndaǵy salalyq termınderdi ıgerý máselesi talqylandy
QR Mádenıet jáne sport mınıstrliginiń Til saıasaty komıtetiniń tapsyrmasymen Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynda ótken sharada ulttyq álipbıdi qabyldaý barysyndaǵy termınderdi qalyptastyrý jaıy talqylandy.
Otyrysta Mádenıet jáne sport vıtse mınıstri N.Dáýeshov sóz alyp, Termınologııalyq jumys tobynyń jumysyn uıymdastyrý osy jyly Bilim jáne ǵylym mınıstrliginen Mádenıet jáne sport mınıstrligine aýystyrylǵanyn tilge tıek etti. Ol búgingi otyrystyń maqsaty – termınologııalyq jumys toby múshelerin qazaq tili álipbıin latyn grafıkasyna 2025 jylǵa deıin kezeń-kezeńimen kóshirý barysynda kezdesetin máselelerdi tıimdi sheshýge jumyldyrý, sony der kezinde belgilep, anyqtap otyrý, termınologııany jańa kezeńge sáıkes jandandyrý joldaryn qarastyrýdy da atap aıtty. Sonymen qatar, aldymyzda termınologııalyq sózdikterdi ázirleý, latyn grafıkasy negizinde termınologııanyń ǵylymı negizderin ázirleý, termınologııalyq bazany tolyqtyrý jáne de basqa jumystardyń turǵanyn alǵa tartty.
Budan keıin ǵalymdar kóterilip otyrǵan másele boıynsha óz oılaryn ortaǵa saldy. Olardyń qatarynda: A.Fazyljanova, S.Qulmanov, Q.Aıdarbek O.Jubaeva, S.Iteǵulova t.b. bar.
Otyrysta atalǵan másele boıynsha professorlar Sh.Qurmanbaıuly qazaq termınderin latyn álipbıine kóshý kezinde A.Baıtursynuly prıntsıpine júginý, qandaı termınderdi aýdaramyz, qandaı termınderdi óz qalpynda alamyz degen máseleni qozǵasa, B.Ábdýálı termın jasaý kezindegi alqaly jıyndarǵa joǵary oqý oryndarynda qyzmet etip júrgen ǵalymdardy da qosý kerektigin tilge tıek etti.
Bul otyrysty «Til-Qazyna» ulttyq ortalyǵynyń bas dırektory Á.Asqar úılestirse, Mádenıet jáne sport mınıstrligi Til saıasaty komıtetiniń tóraǵasy Ǵ.Meldesh qorytyndylady.
