Elordada Jambyl Jabaevtyń 175 jyldyǵyna arnalǵan kontsert ótti
Saltanatty ashylýǵa mádenıet jáne ǵylym qaıratkerleri, Almaty jáne Jambyl oblystarynyń delegatsııalary keldi. Kelýshiler jańa teatr foıesinde uıymdastyrylǵan Jambyl Jabaev mýzeıinen jetkizilgen ekspozıtsııamen tanysty.
«Q.Qýanyshbaev atyndaǵy Memlekettik akademııalyq qazaq mýzykalyq drama teatry men «Astana Opera» memlekettik opera jáne balet teatrynyń sımfonııalyq orkestriniń artısteri kórermenderge «Jyr alyby - Jambyl» atty teatrlandyrylǵan qoıylymyn usyndy. Uly aqynnyń baǵa jetpes murasyn, ózindik ereksheligi men darynyn ashyp kórsetetin ádebı-mýzykalyq kompozıtsııada onyń ataqty aıtystary men áıgili «Keń baıtaq Qazaqstanym», «Aqyndarǵa arnaý», «Kúláshqa», «Lenıngradtyq órenim!» jáne t.b. shyǵarmalary oqyldy», - dep habarlady Mádenıet jáne sport mınıstrliginiń baspasóz qyzmeti.
Merekelik baǵdarlamada Qurmanǵazy atyndaǵy Qazaq ulttyq halyq aspaptary orkestriniń, N.Tilendıev atyndaǵy «Otyrar sazy» Akademııalyq folklorlyq-etnografııalyq orkestriniń, «Jastar» teatrynyń, «Astana Balet» teatrynyń artısteri, «Qorqyt» etno-ansambliniń, «Qulansaz» folklorlyq-etnografııalyq ansambliniń, K.Ázirbaev atyndaǵy Jambyl oblystyq fılarmonııasynyń, «Akak» komýzshylar ansambliniń (Qyrǵyzstan) jeke oryndaýshylary óner kórsetti. Ataqty aqynnyń mereıtoıyna Qazaqstan halyqtary Assambleıasy etnomádenı birlestikteriniń artısteri, «Nomad» balalar horeografııalyq ansambli, «Vaınah» sheshen-ıngýsh halyq ansambli jáne t. b. óz shyǵarmalaryn arnady.
QR mádenıet jáne sport mınıstri Aqtoty Raıymqulova saltanatty ashylýda baıandama jasady.
«Qadirli zııaly qaýym! Jambyl qazaq ádebıeti men mádenıetinde erekshe orny bar Alataýdaı asqaq tulǵa. Jyl dúldúli, epık aqyn retinde qazaqtyń sýyryp salma ımprovızatorlyq ónerin bıik shyńǵa shyǵardy. Tól ónerimiz aıtystyń ereksheligi sóz tapqyrlyq emes, batyldyq, ótkirlik, shyndyqqa toly kórkem beıneli sózder tabylyp, qalyń jurtqa qoǵamdyq máseleni aıqyn jetkize alýymen qundy. Jambyl aıtysy árdaıym tereńdigimen, kórkemdigimen, tarıhı negizderimen astarly mazmunymen jurtty baýrap alǵan edi», - dedi mınıstr óz baıandamasynda.
Aıta keteıik, Qazaqstan Respýblıkasynyń Memlekettik hatshysy, mereıtoıdyń memlekettik komıssııasynyń tóraǵasy Qyrymbek Kósherbaev elordadaǵy Jambyl eskertkishine gúl shoqtaryn qoıǵan edi.
Búgin elimizdegi jáne shet elderdegi qalalar men eldimekenderde Jambyl Jabaevtyń eskertkishteri men bıýstterine gúl shoqtary qoıyldy, árqıly mádenı sharalar ótkizildi.
Saltanatty sharaǵa Almaty oblysynan Jambyldyń tikeleı urpaǵy, nemeresi Saltanat Jambylova kelgen edi.
