Elordada jalǵan vızamen júrgen Nıgerııanyń eki azamaty ustaldy
NUR-SULTAN. QazAqparat - Nursultan Nazarbaev áýejaıynda jalǵan vızamen júrgen nıgerııalyqtar ustaldy, dep habarlaıdy QazAqparat Ulttyq qaýipsizdik komıtetiniń shekara qyzmetine silteme jasap.
Búgin saǵat 04.30 shamasynda elordadaǵy «Nursultan Nazarbaev» áýejaıynda shekara jasaǵy «Ystanbul - Nur-Sultan» baǵytyndaǵy halyqaralyq áýe reısimen ushyp kelgen 29 jáne 49 jastaǵy nıgerııalyq eki azamatty ustady.
«Elimizge kelgen sheteldik jolaýshylardyń memlekettik shekaradan ótýge quqyq beretin qujattaryn tekserý kezinde bul azamattar shekarashylarǵa Qazaqstan Respýblıkasynyń elektrondyq vızasynyń kóshirmelerin usynǵan. Alaıda, elektrondy vıza berý týraly málimetter bazasynda bul azamattarǵa qazaqstandyq vıza berilgeni týraly málimet rastalmady. Sanaýly mınýttardyń ishinde Qazaqstan Respýblıkasy Syrtqy Іster mınıstrliginiń halyqaralyq áýejaıdaǵy resmı ókiline tıisti saýal joldanyp, atalǵan Nıgerııa azamattaryna elektrondy vızanyń berilmegeni, usynylǵan qujattardyń qoldan jasalǵany belgili boldy» delingen habarlamada.
Ustalǵan nıgerııalyqtardyń joly bolmady. Olar kelesi áýe reısimen óz eline deportatsııalanady.
