Elordada jalǵan polıtseıdiń áreketinen zardap shekkender izdestirilip jatyr
NUR-SULTAN. QazAqparat – Elordada ózin quqyq qorǵaý organynyń qyzmetkeri retinde tanystyryp, adamdardy aldaǵan jas jigitke qatysty is tergelip jatyr, dep habarlaıdy QazAqparat.
«Nur-Sultan qalasy Polıtsııa departamenti 1992 jyly dúnıege kelgen M esimdi azamatqa qatysty qylmystyq isti tergep jatyr. Atalǵan adam quqyq qorǵaý jáne arnaıy organdardyń qyzmetkeri retinde ózin tanystyra otyryp, qala turǵynyn aldap, aqsha bopsalaǵan», - delingen Polıtsııa departamenti baspasóz qyzmetiniń málimetinde.
Belgili bolǵandaı, kúdikti qala turǵynyna jumysqa ornalastyrý men nesıe boıynsha problemalaryn sheship berýge ýádesin berip, óziniń atyna avtokólikti tirkeýdi, sondaı-aq jasaǵan «qyzmeti» úshin aqshalaı syıaqyny talap etken. Arnaıy operatsııa barysynda kúdikti adam ustaldy.
«Qazirgi ýaqytta alaıaqtyq jáne bopsalaý faktileri boıynsha sotqa deıingi tergeý amaldary júrip jatyr», - dep naqtylady Polıtsııa departamenti.
Polıtseılerdiń paıymynsha, ustalǵan kúdiktiniń áreketterinen zardap shekkender sany áldeqaıda kóp bolýy múmkin. Polıtsııaǵa aldanǵan úsh azamat shaǵymdanǵan.
Osy oraıda elordalyq Polıtsııa departamenti atalǵan kúdiktiniń is-qımylynan zardap shekkenderdi Beıbitshilik 19 mekenjaıy boıynsha PD Tereý basqarmasyna kelýdi nemese 71-63-10, 71-60-30, 8-702 -755-03-55, 8-775-416-67-92 telefon nómirleri boıynsha habarlasýdy surap otyr.
