Elordada jalǵan páterdi jalǵa bergen alaıaq ustaldy
NUR-SULTAN. QazAqparat - Elorda polıtseıleri jalǵan páterlerdi jalǵa bergen alaıaqty ustady, dep habarlaıdy QazAqparat.
Sotqa deıingi tergeý barysynda kúdiktige alaıaqtyqtyń 11 epızody boıynsha kiná taǵylyp, dáleldengen. Jábirlenýshilerge keltirilgen materıaldyq zalal shamamen 1 mln teńgege baǵalanady.
«Túrkistan oblysynyń 28 jastaǵy turǵyny birneshe aı boıy elordadaǵy páterlerdi jalǵa berý týraly jalǵan habarlandyrýlar ornalastyrǵany anyqtaldy. Jarnamalarda ol naryqtyq baǵadan tómen baǵa qoıǵan jáne asyǵys ekenin, páter jaldaǵysy keletinderdiń kóptigin syltaýratyp aldyn-ala tólemdi talap etken. Ony uıaly aýdarym arqyly alǵan. Máselen, byltyrǵy qarasha aıynda Krisha KZ qosymshasy arqyly jalǵan habarlandyrý jarııalap, Qabanbaı batyr dańǵyly mekenjaıy boıynsha páterdi jalǵa berý syltaýymen elorda turǵynyn aldap, 110 myń teńge kóleminde qarajatyn ıemdengen», - dep jazdy qalalyq polıtsııa departamentiniń baspasóz qyzmeti.
Kúdikti qamaýǵa alyndy, QK 190-baby 2-bóligi (alaıaqtyq) boıynsha tergeý júrgizilýde. Qazirgi ýaqytta qalǵan jábirlenýshiler anyqtalýda.
