Elordada jalǵan qujatpen 18 talapkerdi aldaǵan adam sottaldy
ASTANA.KAZINFORM — Astanadaǵy joǵary oqý oryndarynyń biriniń qyzmetkeri talapkerlerdi oqýǵa «túsirip beremin» degen jeleýmen qylmystyq shema uıymdastyryp, 18 adamdy aldaǵany úshin sottaldy. Ol jalǵan mórler men qujattardy paıdalanyp, ár talapkerden 600 myńnan 900 myń teńgege deıin aqsha alǵan. Bul týraly Bas prokýratýra málim etti.
— Jalǵan mórler men jalǵan qujattardy paıdalaný arqyly ol 18 talapkerdiń senimine kirip, olardy belgilengen qabyldaý tártibinen tys joǵary oqý ornyna oqýǵa túsirýge yqpal etemin degen jalǵan aqparatpen aldap, árqaısysynan 600 myńnan 900 myń teńgege deıin aqshalaı qarajat ıemdengen, — dep habarlady quzyrly organnan.
Basty sot talqylaýy barysynda memlekettik aıyptaýshy sottalýshynyń óziniń qyzmettik jaǵdaıyn paıdalana otyryp, birneshe ret alaıaqtyq jasaǵanyn, sondaı-aq jalǵan resmı qujattardy qoldan jasap, jalǵan mór daıyndaǵanyn tolyq dáleldedi.
— Sot úkimimen kináli adam 3 jyl 6 aı merzimge bas bostandyǵynan aıyrý jazasyna sottaldy. Sot úkimi zańdy kúshine endi, — delingen habarlamada.
Qylmystyq quqyq buzýshylyqpen keltirilgen materıaldyq zalal sottalǵannan óndirildi.
Prokýratýra azamattarǵa qyraǵylyq tanytyp, oqý oryndaryna túsý máseleleri boıynsha tek resmı aqparat kózderine júginýdi usynady.
Buǵan deıin Qostanaı turǵyny 30 mln teńgege alaıaqtyq jasaǵany úshin sottaldy.
