Elordada jalǵa beriletin turǵyn úı baǵdarlamasyna ótinim qabyldaý qarashada bastalady

NUR-SULTAN. QazAqparat - Bıyl elordada 29 jasqa deıingi jumys isteıtin jastarǵa satyp alý quqyǵynsyz jalǵa beriletin turǵyn úı alýǵa ótinimder qarasha aıynda bastalady, dep habarlaıdy QazAqparat Turǵyn úı qoryna silteme jasap.

Qujattardy tapsyrý merzimi jáne qujattar qabyldanatyn portal týraly aqparat Nur-Sultan qalasynyń Turǵyn úı qorynyń ınternet-resýrstarynda aldyn ala jarııalanady.

Esterińizge sala keteıik, baǵdarlama aıasynda turǵyn úı tek jumys isteıtin jastarǵa 5 jylǵa beriledi, osy merzim aıaqtalǵannan keıin páterdi bosatý qajet bolady. Sondyqtan, ótinish berýshi irikteýden ótip, jalǵa beriletin úıge ıe bolsa, bes jyl ishinde óz baspanasyna bastapqy jarna somasyn jınaýy kerek.

Turǵyn úı úshin aı saıynǵy jaldaý aqysy – 5-15 000 teńge. Bul – jumys isteıtin jastardyń óz baspanasyna aqsha jınaýy úshin memleket tarapynan kórsetiletin qoldaý.

Baǵdarlamaǵa qatysý sharttary:

- 29 jasqa tolmaǵan QR azamaty;
- aıaqtalǵan orta/arnaıy orta/joǵary/joǵary oqý ornynan keıingi bilim jáne resmı jumysqa ornalastyrý;
- Nur-Sultan qalasynda sońǵy 2 jyldan kem emes turaqty úzdiksiz tirkeýde bolý;
- ótinish berýshide jáne otbasynyń barlyq múshesinde QR boıynsha menshik quqyǵynda, sondaı-aq 2 jyl ishinde satyp alý quqyǵymen jalǵa beriletin turǵyn úıdiń bolmaýy;
- tólem qabilettiligin rastaý (aı saıynǵy tabys mınımým 116 680 teńge/sońǵy 6 aıda 40 AEK).

Birinshi kezekte ETsQ kiltin alý qajet, al tizim boıynsha anyqtamalardyń barlyǵy jańa bolýy jáne ótinim bergen kezde alynýy kerek. Qajetti qujattar tizimin www.zhilfond.kz.saıtynan bilýge bolady.

Qujattardy tapsyrǵan azamattar arasynda irikteý baldyq júıe boıynsha júrgiziledi:

- Otbasynyń bolýy úshin – 5 ball, nekeniń ár jyly úshin – 2 ball;
- Balanyń bolýy úshin – 1 ball, kelesi árbir bala úshin – 2 ball;
- Bıýdjettik uıymdardaǵy (memlekettik mekemeler men memlekettik kásiporyndardaǵy) eńbek qyzmeti úshin – 5 ball, eńbek ótiliniń ár jyly úshin – 1 ball;
- naryq suranysyna ıe 100 mamandyq tizimine sáıkes mamandyqty ıgergen ótinish berýshige - 10 ball (tizim saıtta jarııalanǵan zhilfond.kz);
- jeke kásipkerlik qyzmetti júzege asyrý kezinde keminde 1 jyl – 5 ball, árbir jyl úshin – 1 ball;
- ótinish berýshiniń ártúrli qyzmet salalarynda jeke jetistikteri bolǵan kezde (kásibı saladaǵy jetistikteri eskeriledi) – 2 ball;
- ekinshi deńgeıdegi bankterdegi jınaq shottaryndaǵy jınaqtardy úshin – 2 ball. Qosymsha aqparatty iKomek-tiń 109 (mobıldi telefondar úshin), sondaı-aq [phone] nómirine qońyraý shalý arqyly alýǵa bolady – «Nur-sultan qalasynyń jastar saıasaty basqarmasy» MM.