Elordada jalǵa alǵan qymbat kólikterdi satyp kelgen alaıaq ustaldy
NUR-SULTAN. QazAqparat - Elordalyq polıtsııa qyzmetkerleri birneshe márte alaıaqtyq jasaǵan kúdiktini ustady, dep habarlaıdy QazAqparat.
Jedel-izdestirý is-sharalaryn ótkizý barysynda krımınaldyq polıtsııa qyzmetkerleri avtomashına satý kezinde birneshe márte alaıaqtyq jasady degen kúdikpen 27 jastaǵy jergilikti turǵyndy ustady. Qazirgi ýaqytta ustalǵan adam 3 alaıaqtyq faktisin jasaǵanyn moıyndady.
Tergep-tekserý barysynda er adam qymbat avtomashınalardy jalǵa alǵany, ári qaraı azamattardyń senimine kire otyryp, naryqtaǵy baǵadan tómen baǵaǵa satqany anyqtaldy.
Osylaısha, ol «Lexus», «Toyota Camry» markaly avtokólikterdi satyp úlgergen jáne Qostanaı qalasynda da «Nissan Qashqai» avtokóligin satqan.
Ustalǵan adam ýaqytsha ustaý ızolıatoryna qamaýǵa alyndy, onyń Respýblıka aýmaǵynda buryn osy sekildi jasalǵan qylmystarǵa qatystylyǵy tekserilýde. QR QK 190-baby boıynsha sotqa deıingi tergep-tekserý júrgizilýde.
Atalǵan tulǵanyń quqyqqa qaıshy áreketterinen zardap shekken azamattar Nur-Sultan qalasy Polıtsııa departamentine, sondaı-aq 8 (7172) 71-60-24,71-61-07 nemese «102» telefondaryna qońyraý shalýyna bolady. 
