Elordada jaldamaly páterge kezdesýge barǵan jigitti uryp-soǵyp, tonap ketken
Jábirlenýshiniń aıtýynsha, ol kóshede eki qyzben tanysyp, telefon nómirlerin alǵan. Eki kúnnen keıin qyzdardyń biri «Vatsap» messendjeri arqyly jigitke tanystyqty jaldamaly páterde jalǵastyrýdy usynǵan. Osy maqsatta jigit bir táýlikke páterdi jalǵa alyp, úıge jańadan tanysqan qyzdy qurbysymen birge shaqyrǵan. Іshimdik iship alǵannan keıin jigit pen qyz jatyn bólmege kirip ketken. 30 mınýttan keıin eki beıtanys jigit bólmege kirip kelip, kezekpen jábirlenýshini uryp-soǵyp, aqsha talap ete bastaǵan. Olar jábirlenýshiden «Aıfon 12» uıaly telefonyn jáne «Apple» markaly smart saǵatyn alyp ketken. Osylaısha olar 650 myń teńge materıaldyq shyǵyn keltirgen.
Jedel izdestirý sharalary barysynda «Almaty» aýdanynyń polıtseıleri kisi tonady degen kúdikpen tórt kúdiktini, atap aıtqanda, 18 jáne 19 jastaǵy eki qyz ben eki jigitti ustady. Tergeý barysynda «ońaı aqshany» kózdegen top qylmysty aldyn ala josparlaǵany anyqtaldy. Jastar kinásin moıyndady, olardan «Apple» markaly smart saǵaty tárkilendi, olar telefondy satyp úlgergen. Sotqa deıingi tergeý amaldary júrgizilýde.