Elordada jabyq saýda orny qyzmetkerleri úshin jataqhana salyndy
NUR-SULTAN. QazAqparat - Bıyl Nur-Sultanda jabyq úlgidegi bazar ashylady, dep habarlaıdy QazAqparat qala ákimdiginiń resmı saıtyna silteme jasap.
Elorda ákimi Altaı Kólginov aýmaǵy 18,5 myń sharshy metrdi quraıtyn «Orda» («Bıg Shanhaı») kóterme-bólshek saýda bazarynyń qurylysymen tanysty. Qyzmetkerlerge jaǵdaı jasaý úshin jataqhana salyndy. Sondaı-aq áleýmettik nysandar salý josparlanyp otyr. Altaı Kólginov ashyq bazar formatynan jabyq úlgidegi bazarlarǵa kóshý qajettigin atap ótti. Bul taýarlardyń sapasy men qaýipsizdigin jaqsartatyny sózsiz. «Memlekettiń ashyq bazarlardy zamanaýı úlgidegi saýda formattaryna kóshirý jónindegi tapsyrmasyn júzege asyrý úshin bazarlardy jańǵyrtý, jańa saýda nysandaryn salý boıynsha jumystar júrgizilip jatyr. Qalada 26 bazar bar. Onyń 14 – jabyq, 12-si quramdastyrylǵan. Osy baǵyttaǵy jumystardy belsendi júrgizý kerek. Óz tarapymyzdan barynsha qoldaý kórsetemiz. Ótken jyly eki jabyq bazardyń qurylysy aıaqtaldy», - dedi qala ákimi.
