Elordada izdeýde bolǵan 42 qylmysker ustaldy
ASTANA. KAZINFORM – Jyl basynan beri elorda aýmaǵynda jasalatyn barlyq qylmys 2,4 paıyzǵa tómendedi. Bul týraly Astana qalalyq polıtsııa departamentinen málim etti.
«Qoǵamdyq qaýipsizdikti qamtamasyz etý tujyrymdamasy aıasynda qoǵamdastyqpen birge Astananyń problemalar kartasy ázirlenip, ony júzege asyrýdyń operatsııalyq jospary bekitildi. Onda quqyqtyq tártipti qamtamasyz etý jáne quqyq buzýshylyqtyń aldyn alý is-sharalary qamtylǵan. Barlyq quqyq qorǵaý, memlekettik jáne jergilikti atqarýshy organdar jumyldyrylǵan. Aldyn alý sıpatyndaǵy is-sharalardy qabyldaýdyń nátıjesinde 2024 jyly barlyq qylmystardyń tirkelýi 2,4 paıyzǵa (2 630-dan 2 499-ǵa) tómendedi», - dedi departamentten agenttik tilshisiniń saýalyna oraı.
Vedostvonyń málimetinshe, qylmystardyń ashylýy da jaqsardy. Kisi óltirý, zorlaý, qaraqshylyq jasaý, avtomobıl urlaý, aýyr buzaqylyq syndy qylmystardyń bári áshkerelendi. Sonymen qatar túngi ýaqytta júrgizilgen aldyn alý sharalarynyń nátıjesinde kóńil kóterý oryndarynda birde-bir aýyr qylmys tirkelgen joq.
«Іzdeýde bolǵan 42 qylmysker ustalyp, iz-tússiz joǵalǵan 61 azamat anyqtaldy. Qabyldanǵan sharalardyń arqasynda ınternet-alaıaqtyq qylmystaryn tirkeý 22,7 paıyzǵa (967-den 670-ke) tómendedi. Sonymen qatar 37 ınternet alaıaqtyq áshkerelenip, 272 jalǵan habarlama men zańǵa qaıshy 37 ınternet resýrs buǵattaldy. Jalpy, elordadaǵy krımınogendik ahýal turaqty jáne baqylaýdy tur», - dedi vedomstvodan.
