Elordada zańsyz júrgen 38 shetel azamaty elden shyǵaryldy
«Elordada quqyq qorǵaý organdarynyń qyzmetkerleri qoǵamdyq tártip pen azamattardyń qaýipsizdigin qamtamsyz etýde. Qaladaǵy jaǵdaı tolyq baqylaýda. Elorda aýmaǵynda 6 blok-beket qoıylyp, tártip saqshylary táýlik boıy kúzetýde. Komendanttyq saǵat rejımi keshki 23.00-den tańǵy saǵat 07.00-ge deıin saqtalady», - dep habarlandy departamentten.
Habarlamada aıtylǵandaı, tótenshe jaǵdaı kezinde jedel aldyn-alý sharalary ótkizilip, polıtseıler turǵyn úılerdi tekserip jatyr.
«Polıtsııa ınspektorlary zańǵa qaıshy áreketterge jol bermeý jáne kóshi-qon zańnamasyn buzý faktilerin anyqtaý maqsatynda 4 649 jaldamaly turǵyn úı men 420 hostelge tekserý júrgizdi. Onyń barysynda kóshi-qon zańnamasyn buzýdyń 1 372 faktisi anyqtalyp, 38 shetel azamaty elden shyǵaryldy. Tótenshe jaǵdaı rejımin buzǵany úshin QR Ákimshilik kodeksiniń 476-baby boıynsha 318 adam ákimshilik jaýapqa tartyldy, onyń 30-y qamaýǵa alynyp jáne 137 adamǵa aıyppul salyndy», - delingen habarlamada.
Sondaı-aq, elorda polıtseıleri tótenshe jaǵdaı kezinde mas kúıinde kólik basqarǵan 10 faktini anyqtap, júrgizýshilerdi qamaýǵa alǵan.
«Osyndaı qıyn kezeńde azamattardyń tarapynan beıqam júrýge jol berilmeýi tıis. Tótenshe jaǵdaı kezeńinde alkogoldik ónimderdi satýǵa tyıym salynǵanyn esterińizge salamyn. Zańbuzýshylyq anyqtalǵan jaǵdaıda, alkogoldi satýshylardyń lıtsenzııasynan aıyrýǵa deıin qatań jaza qarastyrylǵan», - dedi Nur-Sultan qalasy Polıtsııa departamentiniń basshysy, elorda komendanty Erjan Sadenov.