Elordada zańsyz salynǵan 4 qabatty ǵımarat buzylýda
NUR-SULTAN. QazAqparat - Elordada zańsyz turǵyzylǵan ǵımarattardy súrý jumystary júrgizilip jatyr, dep habarlaıdy QazAqparat tilshisi.
«Zańsyz salynǵan ǵımarattardy súrý jumysy Shubar turǵyn úı alabyndaǵy Qulyndy kóshesindegi 3-ǵımarattan bastaldy. Ǵımarat ıesi birneshe sottyń sheshimimen habardar boldy, biraq sot sheshimin oryndamady. Qazirgi ýaqytta ǵımaratty súrý jumystary júrip jatyr. Jumys aldaǵy 1 aı boıy jalǵasady. Bul degenimiz Nur-Sultan qalasynda zańsyz salynǵan ǵımattar qıratylady degen sóz», - dedi Nur-Sultan qalasy Orta sapasy jáne baqylaý basqarmasynyń basshysy Tólegen Qulyshev.
Basqarmasynyń sózine sensek, buǵan deıin atalǵan ǵımarat ıesine qurylysty qaıta josparlaý kerektigi eskertilgen.
«2017 jyldyń 20 maýsymda atalǵan ǵımarat ıesine fýnktsıonaldy maqsatyn ózgertpeı, turǵyn úıdi qaıta qurý týraly sheshim qabyldandy. Alaıda, ǵımarat ıesi sáýlet, qala qurylysy jáne qurylys qyzmeti salasyndaǵy standarttardy eskermeı, qoldanystaǵy turǵyn úıdi buzyp, óz erkimen tórt qabatty jańa úıdiń qurylysyn bastady. Bul áreketi úshin ákimshilik jaýapkershilikke tartylyp, anyqtalǵan eskertýlerdi joıý týraly buıryq shyǵaryldy», - deıdi ol.
