Elordada zańsyz oıyn bıznesin uıymdastyrýǵa ǵımaratty jalǵa berýshi sottaldy
NUR-SULTAN. QazAqparat – Nur-Sultan qalasy boıynsha Ekonomıkalyq tergep-teskerý departamenti elordada zańsyz oıyn bıznesin uıymdastyrý úshin ǵımaratty zańsyz jalǵa berý deregin anyqtady. Bul týraly atalǵan vedomstvodan málim boldy, dep habarlaıdy QazAqparat.
«Tergeý barysynda dúkenniń jalǵa berýshisi qasaqana, paıda tabý maqsatynda zańsyz oıyn termınaldaryn ornalastyrý úshin ǵımaratyn bergeni anyqtaldy. Dúkenniń jalǵa berýshisi men bıznesti uıymdastyrýshy jaýapkershilikke tartyldy», - delingen QR Qarjylyq monıtorıng agenttigi málimetinde.
Agenttik úı-jaılardy jalǵa berýshilerdiń de ǵımaratty zańsyz oıyndar nemese avtomattarǵa usynǵany úshin QR QK-niń 307-baby boıynsha qylmystyq jaýapkershilikke tartylýy múmkin ekendigin habarlaıdy.
Jalǵa berýshiler qylmystyq jaýapkershilikten qalaı qutyla alady?
1. Kommertsııalyq úı-jaılardy jaldaýǵa bergende mindetti túrde jalǵa berý shartyn jasańyz.
2. Úı-jaıdy nemese kommertsııalyq aýmaqty tek zańmen ruqsat etilgen qyzmetti júzege asyrý úshin ǵana jalǵa berińiz.
3. Eger siz úı-jaıdy jalǵa berseńiz, al jalǵa alýshy onda zańsyz oıyn avtomattaryn qoısa nemese astyrtyn kazıno uıymdastyrsa – tez arada qarjylyq monıtorıng organdaryna habarlasyńyz.
Ol úshin Agenttiktiń resmı akkaýntterine jeke habarlamada foto jáne mekenjaıdy joldasańyz nemese +7 (7172) 70-84-78 senim telefonyna habarlassańyz jetkilikti.
