Elordada zańsyz nasybaı men snıýs saýdasyn anyqtaý boıynsha reıd júrgizildi
ASTANA. KAZINFORM – «Zań jáne tártip» qaǵıdaty aıasynda elordanyń Almaty aýdanynda nasybaı, snıýs jáne basqa da shegilmeıtin temeki ónimderiniń zańsyz satylýyn anyqtaý boıynsha kezekti reıdtik is-sharalar ótti, dep habarlaıdy Astana ákimdiginiń resmı saıty.
Monıtorıngtik top quramyna aýdandyq ákimdik ókilderi men polıtsııa basqarmasynyń qyzmetkerleri endi. Olar saýda oryndaryn tyıym salynǵan ónimderdi satý faktisi boıynsha tekserdi.
Aýdannyń eki dúkeninde nasybaı men snıýs satý faktileri anyqtaldy. Tekserý nátıjesinde satýshylar Qazaqstan Respýblıkasynyń Ákimshilik quqyq buzýshylyq týraly kodeksine sáıkes ákimshilik jaýapkershilikke tartyldy. Barlyǵy 61 dana tyıym salynǵan ónim tárkilendi.
– Bul is-sharalar «Zań jáne tártip» qaǵıdaty aıasynda turaqty túrde júrgiziledi. Jumystyń maqsaty tek qoǵamdyq qaýipsizdikti qamtamasyz etý emes, sondaı-aq azamattardyń densaýlyǵyn qorǵaý jáne jastardy salaýatty ómir saltyna tárbıeleýde mańyzdy ról atqarady, - dep atap ótti Almaty aýdany ákimdiginiń ishki saıasat bólimi basshysy Aıdyn Aıdynuly.
2025 jyldyń basynan beri Almaty aýdanynda shegilmeıtin temeki ónimderiniń zańsyz saýdasyn anyqtaý boıynsha 14 reıd ótkizildi. Osy ýaqyt ishinde monıtorıngtik top nasybaı men snıýs satylǵan 45 azyq-túlik dúkenin anyqtady. Jalpy sany 1 201 dana tyıym salynǵan ónim tárkilendi.
Osyndaı profılaktıkalyq sharalar qalanyń barlyq aýdanynda temeki ónimderiniń zańsyz saýdasynyń aldyn alý jáne jol bermeý maqsatynda turaqty túrde jalǵastyrylady.
Buǵan deıin habarlaǵanymyzdaı, Astanada esirtki qylmysyna qatysy bar eki adam qamaýǵa alyndy.