Elordada «Zań men tártip» tujyrymdamasy aıasynda jańa aktsııa bastaldy
ASTANA. KAZINFORM – Astanada Cirque du Soleil ujymynyń OVO shoýy ótip jatqan kúnderi qala prokýratýrasy men elorda ákimdigi uıymdastyrǵan «Zań men tártip» profılaktıkalyq aktsııasy júrip jatyr, dep habarlaıdy Astana ákimdiginiń resmı saıty.
Halyqaralyq ujymnyń gastrolderiniń úshinshi kúni «Barys Arena» kesheniniń foıesinde kórermenderge balalardyń jazǵy kezeńdegi qaýipsizdigine arnalǵan aqparattyq jadynamalar men býkletter taratyldy.
– Іs-shara aıasynda balalar men ata-analarǵa kúndelikti ómirdegi qaýipsiz minez-qulyq qaǵıdalary, jol qozǵalysy erejelerin saqtaý jáne ınternetti jaýapkershilikpen paıdalaný máseleleri boıynsha túsindirý jumysy júrgizilýde. Qoǵamdyq oryndardaǵy minez-qulyq mádenıetin qalyptastyrýǵa jáne kámeletke tolmaǵandardyń qaýipsizdigine tónýi múmkin qaterlerdiń aldyn alýǵa erekshe nazar aýdarylýda. Balalardyń quqyqtaryn qorǵaý, olardyń damýyna qolaıly ári qaýipsiz orta qalyptastyrý jáne quqyq buzýshylyqtardyń aldyn alý – prokýratýra organdarynyń basym mindetteriniń qatarynda, - dedi Baıqońyr aýdany prokýratýrasy bóliminiń prokýrory Nurlybek Nurǵazyuly.
Uıymdastyrýshylardyń aıtýynsha, aktsııanyń negizgi maqsaty – azamattardyń quqyqtyq saýattylyǵyn arttyrý, kámeletke tolmaǵandar tap bolatye jazataıym oqıǵalardyń aldyn alý jáne jazǵy demalys kezeńinde balalardyń quqyqtary men qaýipsizdigin qorǵaý máselelerine qoǵam nazaryn aýdarý.
Profılaktıkalyq jumys «Zań men tártip» tujyrymdamasy aıasynda júrgizilip, óskeleń urpaq arasynda qaýipsizdik mádenıetin qalyptastyrýǵa baǵyttalǵan.
Eske salaıyq, Cirque du Soleil ujymynyń OVO shoýymen álemdik týrnesi Astanada 4-7 maýsym aralyǵynda ótýde. Elordaǵa 25 elden kelgen 130 mamannan turatyn halyqaralyq komanda, onyń ishinde 53 ártis keldi. «Zań men tártip» aktsııasy shoý ótetin kúnderi jumysyn jalǵastyrady.
Buǵan deıin habarlaǵanymyzdaı, Astanadaǵy balalar aýylynda kún elektr stantsııasy iske qosyldy.
