Elordada Ybyraı Altynsarınge eskertkish ashylsa deımin - Ernat Melisuly
NUR-SULTAN. QazAqparat – Nur-Sultan qalasynda aǵartýshy, alǵash qazaq mektebin ashqan pedagog Ybyraı Altynsarınge eskertkish ashylsa ıgi edi. Bul pikirdi Táýelsizdiktiń 30 jyldyǵy jáne Ybyraı Altynsarınniń 180 jyldyq mereıtoıyna oraı arnaıy velosherý uıymdastyrǵan astanalyq belsendi Ernat Melisuly bildirdi, dep habarlaıdy QazAqparat.
«Ybyraı Altynsarındy qazaqtyń tuńǵysh pedagogy retinde bárimiz bilemiz. Aǵartýshy tulǵanyń otandyq bilim salasynda alatyn orny erekshe. Degenmen Nur-Sultan qalasynda áli kúnge deıin atalǵan tulǵaǵa eskertkish qoıylmaǵan. Kóshe bar, onyń ózi kishkentaı bar-joǵy 700 metr, aıtýly tulǵa úshin bul kóshe laıyqty emes dep oılaımyn. Halyq taǵzym etip, gúl shoǵyn qoıatyn arnaıy eskertkishtiń bolǵany abzal. Bıyl táýelsizdik alǵanymyzǵa 30 jyl, jańa elordamyz bolǵaly 20 jyldan asty, osy oraıda Ybyraı Altynsarınge elorda tórinen eskertkish qoıylyp, kórikti ári keń kóshe ataýy berilse degen usynys bar. Shúkir, elordamyz jyl sanap keńeıip kele jatyr, jyl saıyn úıler men ǵımarattardyń sany artyp, tıisinshe jańa kóshelerde paıda bolyp jatyr. Sondyqtan jańa ári keń kóshe tabý másele emes dep oılaımyn. Bul laıyqty is», - dedi elorda turǵyny Ernat Melisuly.
Aıta ketsek, astanalyq belsendi azamat el Táýelsizdiginiń 30 jyldyǵy jáne Ybyraı Altynsarınniń 180 jyldyq mereıtoıyna oraı arnaıy velosherý uıymdastyrdy. Búgin quramynda 5 adamnan turatyn áýesqoı velosıpedshiler elordadan Qostanaıǵa jolǵa shyqty.
