Elordada WorldSkills Kazakhstan ulttyq chempıonaty ótip jatyr
ASTANA. QazAqparat - Elordadaǵy «Kórme» ortalyǵynda WorldSkills Kazakhstan ulttyq chempıonaty ótip jatyr. Búgin QR Premer-Mınıstri Baqytjan Saǵyntaev ulttyq chempıonatqa arnaıy kelip, jarysqa qatysýshylardyń ónerimen tanysty, dep habarlaıdy QazAqparat tilshisi.
Ulttyq chempıonatqa elimizdiń barlyq óńirlerinen kolledjder men joǵary oqý oryndarynyń 350-ge jýyq stýdenti kelgen. Olar tórt kún boıy «kirpish qalaý», «boıaý jáne árleý jumystary», «kondıterlik sheberlik», «elektronıka», «sán tehnologııasy», «shashtaraz», «dánekerleýshi», «aspaz», «naýbaı», «kólik syrtyn jóndeý», «meıramhana qyzmeti», «qonaq úı ákimshisi», «bıznestiń ІT sheshimderi» syndy 30 mamandyq boıynsha kásibı turǵyda baqtaryn synap jatyr.
«Búgingi sharanyń máni aıryqsha. Sebebi el ekonomıkasynyń túrli salalary úshin qajetti bolashaq mamandardy daıyndaý ústindemiz. Ulttyq chempıonat osymen tórtinshi ret ótip jatyr. Jalpy, Qazaqstan alǵash ret WordSkills International qozǵalysyna qosylyp, 2015 jyly alǵashqy chempıonatyn ótkizgen bolatyn. Jastarymyzdyń biliktiligi jyl saıyn arta túsýde. Osy jylǵy ulttyq chempıonatta jeńiske jetkender 2019 jyly Qazan qalasynda ótetin halyqaralyq deńgeıdegi chempıonatta elimizdiń namysyn qorǵaıdy», - dedi «Kásipqor» holdıngi» kommertsııalyq emes aktsıonerlik qoǵamy basqarmasy tóraǵasynyń orynbasary Ásıma Bımendına.
Aıta keteıik, WorldSkills - jumysshy kásibiniń mártebesin arttyryp qana qoımaı, kásibılikti nasıhattaýdy maqsat etetin kommertsııalyq emes qozǵalys.
