Elordada WALS 2024 halyqaralyq konferentsııasy ótip jatyr
ASTANA. KAZINFORM – Premer-Mınıstr Oljas Bektenov elordada ótip jatqan WALS 2024 halyqaralyq konferentsııasy qatysýshylaryna quttyqtaý joldady. Quttyqtaýdy Premer-Mınıstrdiń orynbasary Tamara Dúısenova oqyp berdi.
«Búgingi tańda Qazaqstannyń bilim berý sapasyn arttyrý máselesin talqylaý alańyna aınalyp, ıdeıalardy izdeýde jáne pikir almasýda úzdik dástúrlerdi jalǵastyryp otyrǵany qýanyshty jaıt. Dúnıejúzilik sabaqty zertteý qaýymdastyǵy (WALS) búkil álemdegi zertteýshi-muǵalimderdi biriktirdi jáne álemdik pedagogıkalyq qoǵamdastyqtyń sabaqty zertteý tásilin sátti júzege asyrýda. Búgin munda álemniń 27-den astam eliniń jetekshi sarapshylary men pedagogtary jınaldy. Bul joǵary jaýapkershilik», — dep atap ótedi Úkimet basshysy.
Oljas Bektenov Qazaqstan Prezıdentiniń bilim berýdi jańǵyrtý isine, ásirese, oqytý jáne pedagogterdi daıyndaý sapasyn arttyrýǵa aıryqsha mán beretindigin atap ótedi.
«Sabaqty zertteý — bul ýaqyt synynan ótken jáne kóptegen qazaqstandyq muǵalimniń tájirıbesiniń ajyramas bóligine aınalǵan tásil. Bul eńbek 10 jyldan astam ýaqyt boıy Qazaqstannyń bilim berý júıesine osy tásildi engizý boıynsha keshendi jáne keń aýqymdy jumys júrgizip kele jatqan Nazarbaev zııatkerlik mektepterine tıesili. Konferentsııany ótkizý ǵylymı jáne pedagogıkalyq zertteýler protsesin jaqsartýǵa úles qosatyny sózsiz. Búgingi dıalog álemde bilim berýdi damytýdyń ozyq ıdeıalaryn ilgeriletý máseleleri boıynsha odan ári jemisti jumys úshin jańa yntalandyrý týdyratynyna senimdimin», — dedi Premer-Mınıstr.
