Elordada volonterler muqtaj jandarǵa 1000 azyq-túlik sebetin úlestirdi
Igi isti qalalyq jáne aýdandyq ákimdikterdiń Jastar saıasaty máseleleri basqarmasy, «Astana jastary» KMM jáne qalalyq volonterler shtabymen birlesip qolǵa alyp otyr. Atalǵan shara «El tiregi – Elbasy» aýqymdy qaıyrymdylyq aktsııasy aıasynda júrgizilýde. Sebetterde ár otbasy úshin eń qajetti 50 keli ónim: qaraqumyq, kúrish, qant, makaron, un, maı, shaı, buqtyrylǵan et konservileri jáne kámpıtter bar.
«Qalalyq shtabtaǵy bes myńnan astam volonter azyq-túlik sebetterin taratýǵa, aýmaqtardy tazalaýǵa qatysady. Búgin qala kúnine oraı taratý sharasy ótip jatyr», - dedi Nur-Sultan qalasy ákimdiginiń «Astana Jastary» KMM basshysynyń orynbasary Aıan Ermentaev.
Eriktiler tynymsyz eńbek etýde. Olarǵa qysqa merzimde 50 tonna azyq-túlikti bólip, taratyp berý kerek.
«Men tótenshe jaǵdaı bastalǵannan beri volonter bolyp júrmin. Osy ýaqyt ishinde biz qansha kómek kórsetkenimizdi eseptegen emespin. Árbir qazaqstandyqtyń ómirinde bir ret bolsyn volonterlikpen aınalysqanyn qalaımyn. Al meni qarapaıym adamdardyń alǵysy alǵa jeteleıdi», - dedi erikti Álfarabı Aımaq.
Volonterler pandemııa kezinde toptasyp, muqtaj jandarǵa kómek kórsetý mańyzdy ekenine senimdi.
«Búgin biz azyq-túlik sebetterin elordanyń tórt aýdanyna taratamyz. Azyq-túlikten basqa, biz 30 myńnan astam maska taratqymyz keledi. Mundaı syılyqty mereke kúnderi ǵana emes, únemi jasaımyz. Aıyna keminde 4 ret qaıyrymdylyqpen aınalysamyz. Osyndaı qıyn ýaqytta bárimiz birge bolýymyz kerek. Buryn biz Tımýr men onyń komandasy týraly oqyǵan edik. Eriktiler – bul Tımýr jáne onyń komandasy, biraq sany áldeqaıda kóp. Biz nemquraıdylyqty ysyryp qoıyp, jurtqa kómekteskimiz keledi», - dedi erikti Islambek Baımanov.
Óz kezeginde azyq-túlik sebetterin alǵan otbasylar qaıyrymdylyq aktsııasyn uıymdastyrýshylarǵa alǵystaryn bildirdi.
«Men jalǵyzbasty anamyn, turaqty jumysym joq, onyń ústine áli stýdentpin. Úı jaldap turamyn. Sondyqtan men úshin bul úlken kómek. Nur-Sultan qalasynyń ákimdigine jáne eriktilerge alǵysymdy bildiremin», - dedi elorda turǵyny Aıgúl Telepova.
«Bul kópbalaly otbasylar úshin óte jaqsy kómek. Qala ákimdigi men eriktilerge jáne olardyń kúsh-jigeri úshin alǵys aıtqym keledi. Olardyń aldaǵy jumystaryna sáttilik tileımin», - deıdi elorda turǵyny Márııam Alǵalı.
Aıta keteıik, pandemııa bastalǵaly beri eriktiler halyqtyń osal toptaryna kómek kórsetýde. Qalanyń avtovolonterleri azyq-túlik sebetterin tıisti mekenjaıǵa jetkizýge qatysady. Azyq-túlikti úzdiksiz jetkizýmen qatar, túrli merekelerge arnalǵan iri qaıyrymdylyq aktsııalary uıymdastyrylýda. Mysaly, naýryz aıynda eriktiler 4 000-nan astam azyq-túlik sebetin taratty. Túrli kásiporyndar men qoǵamdyq uıymdar metsenat boldy.
Qala turǵyndary muqtaj jandarǵa qajetti azyq-túlik pen dári-dármek berip, belsendilik tanytýda. Elordanyń keıbir turǵyndaryna sebetter, túrli máseleler boıynsha keńester, aýlalardy tazalaý sekildi turaqty kómek qajet. Eriktiler mundaı mekenjaılardy únemi nazarda ustaıdy.
