Elordada vırýs ınfektsııasy men tumaýǵa qarsy ekpe salý bastaldy
NUR-SULTAN. QazAqparat - Elordada jedel respıratorly vırýstyq ınfektsııalar men tumaýǵa qarsy ekpe salý bastaldy, dep habarlaıdy QazAqparat qala ákimdigine silteme jasap.
Bıyl jedel respıratorly vırýs ınfektsııasy men tumaý kezinde koronavırýspen asqynýy múmkin, osyǵan baılanysty dárigerler aldyn-ala densaýlyqqa mán berý qajettigin eskertedi.
Elorda turǵyndary jedel respıratorly vırýs ınfektsııasyna jáne tumaýǵa qarsy ekpe ala alady. Ol úshin patsıent ózi tirkelgen emhanaǵa júginýi kerek. Preparat kepildendirilgen tegin medıtsınalyq kómek paketine kiredi.
«JRVI men tumaýdyń aldyn alýdyń negizgi ádisi - antıdene qalyptastyratyn vaktsına. Denedegi qorǵanys agentteri vırýsty joıady. Bul ádis aldyn ala qoldanylýy kerek. Sondyqtan Nur-Sultanda 4 qyrkúıekten bastap reseılik vaktsına paıda boldy. Biz JRVI men tumaý órshigenge deıin, bul preparatty ýaqtyly alýǵa keńes beremiz. 0,5 shprıtske quıylǵan daıyn ekpe ıyqtan bulshyqetke salynady», - dep atap ótti №10 qalalyq emhananyń joǵary sanatty dáriger-pedıatry Jankúmis Shaıhıslıamova.
Vaktsınany alty aılyq balalarǵa da qoldanýǵa bolady. Preparat taýyq aqýyzyna allergııasy bar adamdarǵa ǵana ruqsat etilmegen.
Maska taǵý arqyly respıratorly vırýstyq aýrýlardyń aldyn alýǵa bolady. Bul jaǵdaıda ony aýrý da, saý da kııý kerek. Úı-jaılardy,áleýmettik mekemelerdi, keńselerdi jıi jeldetý kerek.
«Sondaı-aq, qolyńyzdy sabynmen jıi jýyp, dezınfektsııa eritindisin qoldanýdy usynamyn. Qoldy jýý tek ishek ınfektsııasynan ǵana emes, sonymen qatar vırýs ınfektsııasy men tumaýdan da qorǵaıdy. Muryn qýysyn álsiz tuzdy eritindimen jýý da kómektesedi. Muryndy jýý yńǵaısyz bolǵandyqtan, keıde maıly emýlsııa qoldanylady. Mysaly, «oksolın maıy», onyń kúshi álsiz bolǵanymen de, aǵzaǵa vırýstyń taralmaýyna yqpal etedi. Vırýs aýyz ben murynnyń shyryshty qabaty arqyly enedi, sondyqtan olardy jıi shaıyp turý kerek», - dep túsindirdi dáriger.
