Elordada velosıpedterdi tirkeý bastaldy
«Polıtsııa departamenti elordanyń Ornyqty damý ortalyǵymen birlese otyryp, velosıpedtiń naqty tulǵaǵa tıesili bolý faktisin rastaýǵa múmkindik beretin biryńǵaı elektrondyq bazany ázirledi. Oǵan velosıpedtiń menshik ıesi, turǵylyqty mekenjaıy jáne uıaly telefony jaıly málimetter, sondaı-aq onyń serııalyq nómiri men velosıpedtiń syrtqy aıryqsha belgi-sıpattamalary engiziledi. Osy bazany ázirleý kezinde biz sheteldik tájirıbeni eskerdik. Máselen, Ulybrıtanııada mundaı baza 2004 jyldan beri jumys istep keledi jáne tirkelgen velosıpedterdiń sany 1 mln-nan asty. Onyń kómegimen 12 myńnan astam velosıped urlyǵy ashyldy», - dedi Arman Aıtmaǵambetov BAQ ókilderiniń qatysýymen ótken baspasóz maslıhatynda.
Onyń málimetinshe, atalǵan tirkeý bazasy 2 apta buryn pılottyq negizde iske qosylǵan. Osy aralyqty 40-qa jýyq elordalyq óz velosıpedi týraly derekterdi engizgen.
«Biz bazanyń kómegimen urlanǵan múlikti jedel tabýdy, ony ıelerine tez arada qaıtarýdy josparlap otyrmyz. Sondaı-aq, siz óz velosıpedińizdi basqa adamnan nemese habarlandyrý saıttarynan tapsańyz, onyń naqty ıesi ózine tıesili ekenin rastaı alady. Osy joba sátti ótse, onda muny samokattarǵa da qoldanamyz», - dep túsindirdi ol.
Elordadaǵy Ornyqty damý ortalyǵynyń ókili Vıtalıı Pýstovoıtenkonyń aqparatyna qaraǵanda, velosıpedterdi tirkeý qazir 2 mobıldi qosymsha arqyly júrgizilip jatyr. Olar - Smart Astana jáne e-Knot. Atalǵan qosymshalarǵa kirip, «Qaýipsizdik» bólimine ótip, velosıpedterdi tirkeýge bolady.
Qosa ketsek, jyl basynan beri Astana aýmaǵynda 106 velosıped urlyǵy tirkeldi.