Elordada velosıped urlyǵy kóbeıdi - polıtsııa

ASTANA. QazAqparat – Jyl basynan beri elordada 106 velosıped urlyǵy tirkeldi. Muny Astana qalalyq Polıtsııa departamenti jergilikti polıtsııa basqarmasynyń bastyǵy Arman Aıtmaǵambetov aıtty, dep habarlaıdy QazAqparat tilshisi.

«Jyl basynan Astana qalasynyń aýmaǵynda 106 velosıped urlandy. Onyń ishinde Almaty aýdany boıynsha – 36, Esil aýdany boıynsha – 34, Saryarqa aýdany boıynsha – 27, Baıqońyr aýdany boıynsha 9 urylyq tirkeldi. Olardyń kóbi, ıaǵnı 47%-y turǵyn úılerdiń podezderinen, qalǵany úılerdiń aýlalarynan urlanǵan. Onyń saldarynan turǵyndarǵa shamamen 3 mln teńge shyǵyn keltirildi. Urlanǵan velosıpedterdiń ortasha quny – 70 myń teńge», - dep málim etti Arman Aıtmaǵambetov BAQ ókilderiniń qatysýymen ótken baspasóz maslıhatynda.

Onyń aıtýynsha, ótken jyldyń sáıkes kezeńimen salystyrǵanda velosıped urlyǵy 2 ese ósti. Byltyr osy aralyqta mundaı 48 fakti tirkelgen bolatyn.