Elordada vandaldar qatań jazalandy

ASTANA. KAZINFORM – Bıyl jyl basynan beri bótenniń múlkin qasaqana joıý jáne zaqymdaý áreketteri úshin 160 adam ákimshilik jaýapkershilikke tartylǵan. Bul týraly Astana qalasy ákimdiginiń baspasóz qyzmeti habarlady. 

«Zań jáne tártip» qaǵıdaty aıasynda elordada vandalızmniń kez kelgen jaǵdaıyna jáne qoǵamdyq tártipti buzý faktilerine júıeli túrde qarsy kúres júrgizilip jatyr.

Onyń ishinde 93-i qamaýǵa alynyp, 67 adamǵa jalpy somasy 10,4 mln teńgeden astam aıyppul salyndy.

 Vandalızmge qarsy sharalardy Astana polıtsııasy men qala ákimdigi Astana prokýratýrasynyń úılestirýimen júrgizip jatyr.

Mysaly, 12 tamyz kúni saǵat 19:20-da «Marden» aıaldamasynda elorda turǵyny mas kúıinde avtobýstyń esigin ádeıi teýip, áınegin syndyrǵan. Ol 10 táýlikke qamaldy. 

Taǵy bir jaǵdaıda 37 jastaǵy astanalyq mas kúıinde Sh.Ýálıhanov pen J.Tarhan kósheleriniń qıylysyndaǵy «Mehkolonna №56» aıaldamasynyń áınegin syndyrǵan.

Ol da 10 táýlikke qamaldy.

26 tamyz kúni de osyndaı oqıǵa tirkeldi. Áıel adam eskertkishtiń músinine kosmetıkalyq zattar (kózge arnalǵan ten) jaǵyp, ádeıi búldirgen. Ol 50 AEK kóleminde aıyppul tóleýge mindetteldi.

Eske sala keteıik, qoǵamdyq oryndardaǵy usaq buzaqylyq pen ózgelerge qurmetsizdik tanytyp, azamattardyń tynyshtyǵyn buzatyn zańsyz áreketter úshin 30 táýlikke deıin qamaýǵa alý jazasy qarastyrylǵan. 

Aıta ketelik ótken jyldan beri elordada «Stop, vandal» aktsııasy ótkizilip keledi.