Elordada vaktsına alýshylar qatary sırep barady
NUR-SULTAN. QazAqparat – Elordada koronavırýs ınfektsııasyna qarsy vaktsına saldyratyn turǵyndardyń sany azaıyp barady. Bul týraly Nur-Sultan qalasynyń bas memlekettik sanıtar dárigeri Sarhat Beısenova aıtty, dep habarlaıdy QazAqparat tilshisi.
«Vaktsına - bul COVID-19-dy jeńýdiń eń qýatty qarýy jáne biz múmkindiginshe kóp adamnyń vaktsına qabyldaýy úshin barlyǵyn jasap jatyrmyz. Vaktsınatsııalaý boıynsha ýaqytsha pýnktterimiz vaktsınatsııany qajet etetin turǵyndardyń kóbirek sanyn qamtýda mańyzdy ról atqarady. Esterińizge sala keteıin, halyqtyń 60 paıyzynda ımmýndyq qabat bolmaıynsha, aýrý eshqaıda ketpeıdi. Ádettegi ómir saltyna qanshalyqty tez oralatynymyz bizdiń azamattarymyzdyń sanasyna baılanysty. Muny tek turǵyndardyń birlesken kúshimen jasaýǵa bolady»,- dedi ol.
Onyń atap ótýinshe, sońǵy aıda vaktsınatsııa qarqynynyń tómendeýi baıqalǵan, mamyr aıynda vaktsınatsııa alǵandardyń sany sáýir aıymen salystyrǵanda 46 paıyzǵa kemigen.
«Sondyqtan men áli de COVID-19-ǵa qarsy vaktsınatsııa almaǵan barlyq azamattardy mindetti túrde vaktsına qabyldaýǵa shaqyramyn. Elordadaǵy epıdemıologııalyq jaǵdaı men koronavırýstyq ınfektsııanyń ósýi bizdiń júris-turysymyzǵa jáne aldyn alý is-sharalaryn qanshalyqty eskeretinimizge tikeleı baılanysty. Sondyqtan ár azamattan osy vırýsty jeńý úshin vaktsınatsııa alýǵa ýaqyt bólýdi suraımyn. Tańdaýdy densaýlyq úshin jasaıyq», - dedi Sarhat Beısenova.
