Elordada vaktsına alýǵa nıet bildirgender qatary bes ese artty
NUR-SULTAN. QazAqparat – Elordada keshe vaktsınanyń birinshi komponentin taǵy 7,5 myń adam aldy. Nıet bildirgender qatary bes ese artty, dep habarlaıdy QazAqparat qala ákimdigine silteme jasap.
«Ótken aptalarda biz kúnine 1 400-2 000 adamdy vaktsınatsııaladyq. Biraq sońǵy kúnderi tilek bildirýshi sany artyp keledi. Jurt óz densaýlyǵyna, aınalasyndaǵy adamdardyń densaýlyǵyna alańdaı bastady. Koronavırýstyń jańa qaýipti shtamy — «Delta» (úndi shtamy degen ataýmen belgili) paıda bolǵaly ekpe alatyndar qatary artty. Sońǵy táýlikte vaktsına alǵysy keletinder sany bes ese kóbeıdi», — dep atap ótti qalalyq Qoǵamdyq densaýlyq saqtaý basqarmasy.
Sondaı-aq, vedomstvo túrli kásiporyndardyń eńbek ujymdaryn vaktsınatsııalaýǵa arnalǵan kóshpeli brıgadalardyń jumysy týraly da aıtyp ótti.
«Biz eńbek ujymdaryn vaktsınatsııalaýdy jalǵastyramyz. Mysaly, vaktsınanyń birinshi komponentin kommýnaldyq qyzmet, PIK (MIB) jáne t.b. qyzmetkerleri aldy. Eńbek ujymdarynan kúnine bir myńǵa jýyq adam vaktsınatsııalandy», — dep tolyqtyrdy Qoǵamdyq densaýlyq saqtaý basqarmasy.
26 maýsymdaǵy jaǵdaı boıynsha barlyǵy 203 myńǵa jýyq azamat vaktsınanyń birinshi komponentin alsa, 142,5 myń adam tolyq ımmýndaýdan ótti. Basqarma qoımalarynda vaktsınalar qory jetkilikti.
Qala turǵyndaryn vaktsınatsııalaýǵa yntalandyrý úshin baǵaly syılyqtardyń utys oıyndary uıymdastyryldy. Buǵan deıin Nur-Sultan qalasynyń ákimi Altaı Kólginov eki bólmeli páterdiń utysy ótetinin jarııalaǵan bolatyn.
Páterdiń utys oıynyna osy jyldyń 25 maýsymynan 31 tamyzyna deıin vaktsınanyń birinshi komponentin alatyn 18 jastan asqan qala turǵyndary qatysa alady.
Buǵan deıin MEGA Silk Way saýda oıyn-saýyq ortalyǵynyń egý pýnktinde birinshi komponentin alǵandar arasynda avtomobıldiń utys oıyny ótetini habarlanǵan bolatyn.
Budan basqa «Azııa Park», «Mega Silk Way», «Saryarqa», «Ábý-Dabı Plaza», «Kerýen», «Eýrazııa» SOO-larynda turmystyq jáne kompıýter túrindegi baǵaly syılyqtar oınatylyp jatyr, sol sııaqty jeńildik kýpondary beriledi. Bul aktsııaǵa jaqynda «Mechta» elektronıka jáne turmys tehnıkasy dúkenderiniń saýda jelisi qosylady.
