Elordada vaktsına alǵysy keletin júkti jáne emizýli analardyń qatary kóp – basqarma
NUR-SULTAN. QazAqparat – Nur-Sultan qalasynda koronavırýsqa qarsy ekpe saldyrǵysy keletin júkti áıelder men emizýli balasy bar analardyń qatary kóp. Bul týraly Nur-Sultan qalasy qoǵamdyq densaýlyq saqtaý basqarmasynyń baspasóz hatshysy Áıgerim Ardaq málim etti, dep habarlaıdy QazAqparat tilshisi.
«Elordaǵa 35 100 doza Pfizer ekpesi jetkizildi. Atalǵan vaktsınany júkti, emizýli analar jáne 12 jasqa tolǵan jasóspirimderdiń saldyrýyna bolady. Búginde qalada 5 myń júkti áıel jáne 28 myń emizýli ana bar. Sondaı-aq, 63 myń jasópirim bar (12-17 jas aralyǵynda). Pfizer ekpesin qansha adam alý kerektigine qatysty tizim jasalyp, medıtsına mekemelerine habarlama jiberildi. Mektepke kelsek, búginde ata-analarmen túsindirý jumystary ótip jatyr. ıAǵnı ata-analarmen synyp saǵattary, kezdesý taǵy basqa sharalar. Qazir vaktsına saldyrýǵa daıyn mektepter bar, onyń tizimin keıin belgili bolady. Keıbir mektep basshylary oqýshylardyń vaktsına alý protsesin kópshilikke jarııa etkenin qalamaıdy», - dedi Áıgerim Ardaq tilshilerdiń suraǵyna jaýap bere turyp.
Onyń aıtýynsha, jasóspirimderge vaktsına salar aldynda ata-ananyń ruqsaty bolýy mindetti.
«Pfizer ekpesi tek medıtsınalyq mekemelerde, emhanalarda jáne mektepte salynady. Oıyn-saýyq jáne saýda ortalyqtarynda atalǵan vaktsına bolmaıdy. Pfizer ekpesiniń bir flakonyn 6 adamǵa egýge bolady. Bizge vaktsına alǵysy kelip habarlasyp jatqan júkti jáne emizýli analardyń qatary kóp. Óz kezegimizde kelip túsken ótinishterdi mamandarǵa jiberip, keńes berilip jatyr» - deıdi ol.
Aıta keteıik, búgin elorda da Pfizer vaktsınasyn salý protsesi bastaldy. Alǵash bolyp 17 jasar astanalyq jasóspirim salǵyzdy.
Sondaı-aq, astanalyq emizýli ana da ekpeden keıingi áserin bólisken bolatyn.
