Elordada úzdik jaýyngerlik jekpe-jek ókilderi óner kórsetedi
ASTANA. QazAqparat - Elordada ekinshi ret Halyqaralyq jaýyngerlik óner festıvali ótkiziledi, dep habarlaıdy qalanyń resmı saıty.
Álemdegi túrli jekpe-jekterdiń úzdik ókilderi bir arenada bas qosady. Italııa, Qazaqstan, Qytaı, Reseı, Fılıppın jáne Japonııa memleketteriniń sheberleri kórermender nazaryna 11 jarys túri boıynsha kórneki urystar usynady, sonyń ishinde djıý-djıtsý, kıokýshınkaı-kan karate, qoıan-qoltyq urys, sýmo, taekvando, mýaı-taı, vın-chýn, qazaqsha kúres, brazılııalyq djıý-djıtsý, shaolın-tsıýan jáne pekıtı-tırsııa kalı.
Bıyl sharaǵa Vın-Chýn Halyqaralyq federatsııasynyń (IWCO) qurmetti prezıdenti - Sıfý Donald Mak, Ultimate Fighting Championship qamqorlyǵymen óner kórsetetin, aralas stıldegi kásipqoı sportshy Habıb Nýrmagomedov, kásipqoı reseılik taıbokser jáne kıkbokser, taı boksynan jáne kıkbokstan kásipqoılar men áýesqoılar arasyndaǵy jarystardyń birneshe dúrkin jeńimpazy, taı boksynan Reseıdiń eńbek sińirgen sport sheberi Artem Levın syndy tulǵalar qatysady.
Mańyzdy sporttyq sharadan qazaqstandyq sportshylar da tys qalmaıdy. Elimizdiń tanymal boksshysy, 2005 jylǵy jáne 2007 jylǵy álem chempıony, 2012 jylǵy olımpıada chempıony, «Astana Arlans» kásipqoı boks klýbynyń bas dırektory Serik Sápıev, taı boksy men K-1 kásipqoı sportshy, áýesqoılar arasyndaǵy álem chempıony, kásipqoılar arasyndaǵy Taıland Koroli kýbogynyń ıegeri Dáýlet Otarbaev, karate men MMA-den álemniń úsh dúrkin chempıony, djıý-djıtsýden Eýropanyń úsh dúrkin chempıony Aıdar Mahmetov, sondaı-aq, Qazaqstannyń djıý-djıtsý men MMA federatsııasynyń prezıdenti Anatolıı Kım sııaqty kesh qonaqtary óz sheberlikterin ortaǵa salady.
Festıval elorda kúnine oraı ekinshi ret ótkizilmek. Atalmysh shara álemniń túrli jekpe-jekter boıynsha úzdik sportshylardyń basyn qosatyn biregeı alańǵa aınaldy.
Eske salaıyq, birinshi jaýyngerlik óner festıvaline barsha álemnen 150 jýyq sheber qatysyp, shara barysynda Stıven Sıgal, Sergeı Badıýk pen Batý Hasıkov kópshilikke túrli jekpe-jekterden aıla-tásilder kórsetti. Sonymen qatar elordalyq kórermender alǵash ret shaolın monahtarynyń ónerin tamashalady.
