Elordada úzdik jas órt sóndirýshiler anyqtaldy
ASTANA. 18 mamyr. QazAqparat - Elordada jas órt sóndirýshiler jasaǵy arasynda órtten qutqarý sporty boıynsha qalalyq jarys ótti, dep habarlaıdy astana.kz saıty qalalyq TJD baspasóz qyzmetine silteme jasap.
Vedomstvonyń málimetteri boıynsha, bıylǵy jyldyń basynan beri elordada 293 órt tirkelip, 5 bala kóz jumǵan. Órt balalardyń shalaǵaılyǵynan oryn alǵan. Ókinishtisi, tilsiz jaý sol búldirshinderdiń ómirin qıyp ketedi.
Jas qutqarýshylar jasaǵyn qurýdaǵy maqsat - balalardy erlikke baýlyp, olardyń boılarynda azamattyq borysh pen otansúıgishtik sezimderin qalyptastyrý bolyp tabylady.
Mamyrdyń birinen bastap Astanada órtten qutqarý sporty boıynsha jas órt sóndirýshiler jasaǵy arasynda aýdandyq irikteý jarystary ótkizildi. Órtten qutqarý sportynyń keıbir túrleri engizilgen sporttyq jarystar da uıymdastyryldy. Fınalǵa elordanyń №20, 22, 24, 30, 35, 45 mektepterinen 6 komanda qatysty.
«Atalǵan is-shara birinshi kezekte oqýshylardyń boıynda túrli tosyn jaǵdaılarda abdyrap, saspaı tez sheshim qabyldaý daǵdysyn qalyptastyrýǵa baǵyttalǵan. Osy jarystyń jeńimpazdary men qatysýshylary mamandandyrylǵan oqý oryndaryna oqýǵa túsetin bolsa, bul daǵdylary olarǵa kómekteseri sózsiz», - deıdi Memlekettik órt baqylaý bóliminiń bastyǵy, órtke qarsy qyzmet maıory Oral Ábdirahmanov.
Jarystyń qorytyndysy boıynsha №45 mektep komandasy jeńimpaz atansa, ekinshi oryn №20 mektepke, úshinshi oryn №24 mektepke buıyrdy. «Úzdik shyǵarma» baıqaýy boıynsha №20 mektep oqýshysy Svetlana Hakimova; úzdik sýret baıqaýy boıynsha №35 mektep komandasy jeńiske jetti.
«Sporttyq jarystyń jeńimpazdary gramotalarmen, kýbokpen, sondaı-aq, sporttyq qural-jabdyqtarmen marapattaldy.
