Elordada úzdik stýdentterdiń sleti ótti
ASTANA. Jeltoqsannyń 7-si. QazAqparat /Quralaı Orynbekqyzy/ - Búgin QR Táýelsizdik saraıynda «Biz -Táýelsizdik qurdastarymyz! Bizdiń Otanymyz - Qazaqstan» atty jasóspirimder jáne jastar forýmy aıasynda Úzdikter sleti ótti,
dep habarlaıdy QazAqparat tilshisi.
QR Bilim jáne ǵylym mınıstrligi, L.N.Gýmılev atyndaǵy Eýrazııa ulttyq ýnıversıteti jáne Qazaqstan stýdentteri alıansynyń uıymdastyrýymen ótken is-sharaǵa oqýy úzdik 150-den astam stýdent qatysty. Olardyń qatarynda sondaı-aq arnaıy shaqyrylǵan Reseı, Túrkııa, Qytaı elindegi qazaqstandyq jastar bar.
«Elbasy Qazaq ulttyq ýnıversıtetinde oqyǵan dárisinde keleshekte bizdiń bilim jáne ǵylym júıemiz qalaı damýy kerektigin sóz etti. Sonyń ishindegi úlken baǵdarlama - Intellektýaldyq rýh baǵdarlamasy. Onyń bolashaǵy da, negizi de osy zalda otyrǵan bizdiń stýdentter dep oılaımyn. Adam balasy bir-birinen bilimnen ǵana oza alady. Sondyqtan, búgin Qazaqstannyń eń jaqsy oqıtyn stýdentteri jınalyp, ózderiniń quryltaıyn ótkizip otyr. Elbasynyń qandaı da bolmasyn kezdesýin alsańyz, qandaı bolmasyn baǵdarlamasyn ashsańyz, barlyǵy jastardan bastalady», dedi Ál-Farabı atyndaǵy Qazaq ulttyq ýnıversıtetiniń rektory Baqytjan Jumaǵulov óz sózinde. Rektordyń aıtýynsha, álemniń túkpir-túkpirinde bizdiń stýdentterimiz oqyp jatyr. «Qazaqstannyń joǵary oqý oryndarynda bilim alýǵa barlyq jaǵdaı jasalyp otyr. Olar sheteldik keıbir ýnıversıtetterden kem emes dep oılaımyn», dedi ol.
«Sonymen birge, Nursultan Nazarbaev sııaqty eshqandaı eldiń Memleket basshysy minberden «Jastar men senderdi ǵylymmen aınalysýǵa shaqyramyn!» dep aıtpaǵan. Sondyqtan, men senderge quryltaıdyń joǵary deńgeıde ótip, al senderdiń jaqsy nátıjelerge qol jetkizýlerińdi tileımin», dep atap ótti B.Jumaǵulov.
