Elordada úzdik medıtsına qyzmetkerleri marapattaldy
ASTANA. QazAqparat - Búgin Astana qalasy ákimdiginde Medıtsına qyzmetkeri kúnine oraı saltanatty shara ótti. Atalmysh sharaǵa QR Densaýlyq saqtaý jáne áleýmettik damý vıtse-mınıstri Salıdat Qaıyrbekova, Astana qalasy ákiminiń orynbasary Ermek Amanshaev, QR Parlamenti Májilisiniń depýtaty Nadejda Petýhova, Astana qalasy máslıhatynyń hatshysy Sansyzbaı Esilov pen «Ulttyq ǵylymı medıtsına ortalyǵy» AQ bas dırektory Abaı Baıgenjın qatysty.
Astana qalasy ákiminiń orynbasary barlyq densaýlyq saqtaý salasy qyzmetkerlerin kásibı merekesimen quttyqtap, ár mamannyń osy salaǵa qosqan ólsheýsiz úlesine toqtalyp ótti.
- Barshańyzdy kásibı merekelerińizben shyn júrekten quttyqtaımyn. Sizder, kásibı maman retinde densaýlyq saqtaý salasy men elordanyń damýyna súbeli úles qosyp jatyrsyzdar. Bárińizge baqyt, densaýlyq, tolaǵaı tabystar tileımin, - dedi E. Amanshaev.
Shara barysynda elordanyń 30 jýyq medıtsına qyzmetkeri dıplomdarmen, «Qazaqstan Respýblıkasynyń densaýlyq saqtaý salasyna qosqan úlesi úshin» jáne «Qazaqstan Respýlıkasynyń densaýlyq saqtaý salasynyń úzdigi» medaldarymen marapattaldy. Sonymen qatar, úzdik medıtsına qyzmetkerlerine QR Densaýlyq saqtaý jáne áleýmettik damý mınıstrligi jáne Astana qalasynyń ákimi atynan qurmet gramotalary tabystaldy.
Medıtsına qyzmetkeri kúnine oraı «Óz isiniń úzdigi» jarysynyń qorytyndysy shyǵarylyp, jeńimpazdar marapattaldy. Bıyl jarys 4 atalym boıynsha ótkizildi. Onyń nátıjesi boıynsha, №2 balalar aýrýhanasynyń hırýrgy Aǵabek Chıkınaev «Úzdik dáriger» atansa, «Úzdik medbıke» ataǵyn №1 qalalyq aýrýhanasynyń medbıkesi Baǵlan Álkenova enshiledi. Al, respýblıkalyq jedel sanıtarlyq avıatsııa brıgadasynyń feldsheri Bolat Sháripov «Úzdik feldsher», №4 qalalyq emhananyń bas dárigeri Serik Sháımerdenov «Densaýlyq saqtaý salasynyń úzdik menedjer-uıymdastyrýshysy» bolyp tanyldy, dep habarlaıdy astana.kz.
Eske sala keteıik, medıtsına qyzmetkeri kúni 1980 jyldan beri maýsym aıynyń úshinshi jeksenbisinde merekelenip keledi. Ústimizdegi jyly bul ataýly kún 21 maýsymǵa túsip tur.
